पाककृती स्पर्धा क्र 1: पदार्थ एक रेसिपी अनेक-अमेरिकेत 12 वाजेच्याआधी बटाटीय रुमाल

"आज का बनवतेयस?आज 26 तारीख आहे.स्पर्धा 25 तारखेपर्यंत होती."
"आज शनिवार आहे आणि मला वेळ आज आहे.अमेरिकेत कुठेतरी कॅलिफोर्निया वगैरे मध्ये अजून रात्रीचे 12 वाजले नसतील आणि 25 तारीख चालू असेल."
"आणि एन्ट्री नाही स्वीकारली तर?"
"जिंकणे हा मूळ उद्देश नाही.आपण रोजच्या स्वयंपाकातून निघून असं वेगळं काही करू शकतो का या स्वयंतपासणीची संधी हे मुख्य उद्दीष्ट आहे.स्पर्धा मुदतीच्या आत पदार्थ बनणे हे साधन आहे, साध्य नव्हे."
(आता मनात इतके बापटिस्ट फंडे टाकून झाल्यावर मूळ कृतीकडे वळूया.)
फोटो कदाचित चांगले येणार नाहीत.पण हा बटाटा आहे.बटाटा कोणाला आवडत नाही?त्यामुळे तो कोणत्याही रुपात असला तरी मिटक्या मारत खा.

१. घाईकृतीपुष्प क्र १: रोस्ट बेबी बटाटे
या कृतीला 4 महत्वाचे घटक-संयम, कोणावर तरी काढायचा असलेला राग, बेबी बटाटे आणि मिरपूड मीठ चिली पावडर.
बेबी बटाटे धुवून पुसून वाळू द्यावे. आता ऑफिसात, ट्रॅफिक मध्ये साठून असलेला सर्व राग एकत्र करावा आणि आपण कोण तो दामर टेड बंदी राघवन असल्याच्या आवेशात बटाट्याना काट्याने भोसकावे.याने लवकर भाजले जातात.कोणताही बटाटा जास्त भोसकून मध्ये 2 भागात तुटला नाही पाहिजे.फाऊल होते.
आता कढईत अगदी 1/3 चमचा तेल(हे फक्त मीठ मसाला चिकटण्या पुरते) टाकून बेबी बटाटे, मीठ,मिरपूड,चिली पावडर नीट मिसळून सगळे सारखे मध्यम आचेवर हलवत राहावे.बटाट्याना वरून सुरकुत्या पडल्या पाहिजेत.शिजले की नाही ते टेडबंडीबुरखा परत चढवून काट्याने भोसकून परीक्षा करून पाहा. शिजले की मस्त बाऊलमध्ये घेऊन त्याच भोसकलेल्या काट्याने गरम गरम खा.यात चिली पावडरच हवी.कांदा लसूण मसाला(klm) टाकल्यास फाऊल धरले जाईल.

घाईकृतीपुष्प क्र 2: बटाटे दही भरीत
उकडलेले बटाटे गार झाल्यावर सोलून तुकडे करून त्यात दही,मीठ घालावे.मिसळून घ्यावे.अगदी छोटा 1 चमचा तूप हिंग जिरे हिरवी मिरची फोडणी घालून मिसळून चवीने खावे.वर कोथिंबीर फोटोसाठी घातली आहे.पण ती न घातल्यास ही उत्तम उपास डिश आहे.

घाईकृतीपुष्प क्र 3: बटाटे काचऱ्या
बटाट्याचे पातळ काप करावे.सालं काढली नाहीत तरी चालेल.काप पातळ आहेत.सालं तोंडात येणार नाहीत.
उगीच भांड्यांचा पसारा न मांडता रोस्ट बेबी बटाटे केलेल्या कढईत 1 चमचा तेल घालून तापले की मोहरी आणि चिमूट हिंग हळद घालावे.
बारीक चिरलेले काप नीट मिसळून मंद आचेवर हलवत राहावे.
थोडे शिजत आले की मीठ आणि कांदा लसूण मसाला घालून नीट मिसळावे आणि झाकण घालून नीट शिजू द्यावे.
काढून बाऊल मध्ये काढावे.

घाईकृतीपुष्प क्र 4: बटाटे मटार चटई
या रेसिपीचा महत्वाचा घटक: स्वतःवर असलेला फाजील आत्मविश्वास.
चटईला इंटिग्रिटी यायला थोडा कार्ब पीठ कंटेंट हवा.पण हा कंटेंट खाताना कच्चा नाही लागला पाहिजे.त्यामुळे दुसऱ्या कोणीतरी दुकानात भाजलेला पाव वापरावा.
पावाचे 4-5 तुकडे करून आधीच्या कृतीत कचऱ्या केलेल्या कढईतून काचऱ्या काढून खमंग भाजावे.एकदम कुडकुडीत सोनेरी रंग यायला हवा.भाजून गार झाले की मिक्सरमधून काढावे.हा आपला इंटिग्रिटी एजंट.
मटार कोरडी पाणी न घालता, बटाटा पाणी न घालता कुकरला शिजवून वेगवेगळे कुस्करावे.यात आलं लसूण मिरची(मटार मध्ये कोथिंबीर पण) मीठ घालून आणि ब्रेड चा चुरा घालून नीट मळावे.आणि लांब चटई साठी वळून दोऱ्या कराव्या.
आता मागच्या वर्षी वरणभात स्पर्धेत मायक्रोव्हेव मध्ये चिकटलेल्या, खरवडाव्या लागलेल्या बाद पापड चटई चा ptsd लक्षात घेऊन काळजीपूर्वक चटई विणावी आणि जास्त न खेळता त्याला किंचित तेल लावून डिशमध्ये पेपर ठेवून मायक्रोवेव्ह मध्ये 5 मिनिट मायक्रोव्हेव करावे.मग ज्या बेक पेपर वर ठेवले तो अलगद ताटात उलटावा.भाजलेले तांदूळ पिठी वापरल्यास अजून पातळ तलम चटई बनवता येईल.हे बटाटा मटार भाजका पाव असल्याने चवीला छान लागतेच.तयार चटई प्लेटमध्ये खोबरे कोथिंबीर घालून सजवून फोटो काढावा.

हे सर्व कुटुंबाला ऑफर करावे.बटाटा असल्याने ते आजूबाजूला घिरट्या घालत असतीलच.