अंत: अस्ति प्रारंभ: - 2 - {कोरडे} - {SharmilaR }

अंत: अस्ति प्रारंभ: - 2 - {कोरडे} - {SharmilaR }

कॉलेज पासूनच्या त्यांच्या मैत्रीतच त्यांना उमगलं होतं, आपल्या दोघांचीही लेखनाची आवड आहे. दोघांनीही आधी इथे तिथे थोडं फार लिहिलं होतं, पण अजून चाचपडणं चालूच होतं.

नशिबाने पुढे कामाचं ठिकाणही एकच होतं. मग दोघांनाही वाटलं आपण मिळूनच काही लिहून बघूया का? आणि मग जन्माला आलं, ते नव्या पिढीच्या भाषेतलं, तरुणाईला रुचेल असं पुस्तक. सुदैवाने ते प्रकाशितही झालं.

नुकताच त्याच पुस्तकावर आधारित चित्रपटाला देश पातळीवरचा पुरस्कार मिळाला होता. आज तो पुरस्कार साजरा करण्यासाठी समारंभ आयोजित केला होता निर्मात्याने. मंचावर दिग्दर्शक, नट नट्या होते. ते दोघे हॉल मधे होते.

संपूर्ण हॉल मधे टाळ्यांची बरसात होत होती.
ते दोघे मुसळधार पावसात होते, पण कोरडेच.
*************