" पुढचा प्रवास खूप अवघड आहे . "
" मला कल्पना आहे. "
" तुला खूप त्रास होईल "
" होऊ दे मी तो सहन करेन "
" एकटं रहावं लागेल … "
" मी राहीन "
“ खुप अडचणींचा सामना करावा लागेल . ”
“ मी करेन ”
" परत विचार कर "
" प्रश्नच नाही ! "
" ठीक आहे तर मग … जशी तुझी मर्जी "
" मी तयार आहे …. "
त्याने एकदा तिच्याकडे पाहिलं . तिच्या डोळ्यांत त्याला निर्धार दिसत होता . त्याच्या समोर त्याचा लॅपटॉप होता . त्यावर क्षणाक्षणाला बदलणारे आकडे आणि सतत वर खाली होणारा ग्राफ सुरू होता . तो अधीरपणे समोरचे सतत बदलणारे आकडे पहात होता . त्याच्या डोळ्याची पापणीही लवत नव्हती . ती त्याच्या बाजूलाच बसली होती . त्याची घालमेल तिला समजत होती . तिने त्याच्या हातावर तिचा मुलायम हात ठेवला . त्याने काहीसं चमकून तिच्याकडे पाहिलं . तिने डोळ्यांनी दिलासा दिला . त्यानंतर त्याने पुन्हा लॅपटॉपच्या स्क्रिनवर लक्ष केंद्रित केलं . नाकावर घसरणारा मोठा चष्मा त्याने पुन्हा व्यवस्थित डोळ्यांवर बसवला . आता त्याने एक ऑर्डर टाईप केली . आणि sell च्या बटणावर कर्सर आणला . समोरचा ग्राफ नवनवीन उंची गाठत होता . त्याचसोबत खाली असलेल्या इंडिकेटर्स कडेही त्याचं लक्ष होतं. तो ग्राफ जसजसा वर जात होता , त्याच्या चेहऱ्यावरील तणाव आणखी वाढत होता. त्याला श्वास घेणं जड जाऊ लागलं तसा त्याने तोंडावरचा मास्क काढून टाकला . आता लवकरच तो क्षण येईल असं त्याला वाटलं . त्याने तिचा हात हातात घेतला . ग्राफ अत्युच्च पातळीवर होता .त्याच वेळी खाली असलेल्या इंडिकेटरकडे त्याचं लक्ष गेलं. तो थोडासा खाली आलेला त्याने पाहिला. हीच ती वेळ ! इंडिकेटरने आधीच सूचना दिली होती . त्याने क्षणाचाही विलंब न लावता sell बटणावर क्लिक केलं. आणि त्यानंतर कड्यावरून धबधबा कोसळावा तसा तो ग्राफ खाली आला . तिने त्याच्याकडे पाहिलं , तोपर्यंत त्याने डोळे मिटले होते ….
₿₿₿
दि - १८ एप्रिल २०२१
रात्रीचे दोन वाजले होते . अमर त्याच्या राहत्या घरी हॉल मध्ये सोफ्यावर बसल्या बसल्याच पेंगत होता . त्याच्या समोर त्याचा लॅपटॉप चालू होता , बाजूला चहाचा कप , ऍश ट्रे मध्ये तीन चार अर्धवट जळलेल्या सिगारेट्स , त्याच्या बाजूला एक नोट पॅड आणि पेन पडलं होतं. अचानक अमरचा फोन वाजला , त्याची रिंगटोन एवढी जोरात वाजली की त्या आवाजाने तो दचकून जागा झाला . आधी तर त्याला त्या फोनचाच राग आला , चांगला डोळा लागला होता अन मधेच हा फोन वाजला . काहीशा वैतागानेच त्याने जडावलेले डोळे कष्टाने उघडत मोबाईल पाहिला , त्याला आणखीनच राग आला .
' हा साला आता कशाला फोन करतोय ? ' त्याने दुर्लक्ष करत फोन कट केला आणि बाजूला ठेऊन दिला . त्याचा डोळा लागतो न लागतो तोच फोन पुन्हा वाजला . वैतागून त्याने फोन घेतला .
" अबे क्या हुआ ? कायको फोन कर राहा है ? रात्रीचे दोन वाजलेत .... चांगली झोप लागली होती यार ... "
" साब , आपका निंद तो अब वैसेभी उडने वाला है " पलीकडून आवाज आला .
" क्या हुआ ? " , अमरच्या डोळ्यांवर अजूनही झोप होती. तो डोळे बंद करूनच फोनवर बोलत होता.
“ बहुत बडा कांड होगयेला है साब ”
" फिरोज , पका मत . क्या है वो जलदी बोल . " अमर वैतागला .
" ओमी मिरचंदानी मर गया ... " पलीकडून फिरोज दबक्या आवाजात म्हणाला .
“ ठीक आहे ना मग … मेला तर मेला . मी काय करू ? ” अमर बेफिकिरीने म्हणाला.
“ साहेब , तुमी नाव नीट ऐकला नाय वाटते … ओमी मिरचंदानी मेssलाsss ”, मेला हा शब्द ताणत फिरोज म्हणाला.
" अरे कोण ओमी मिरचंदानी ? " , वैतागून अमरने विचारलं . आधीच त्याला झोप अनावर होत होती , त्यात फिरोज नक्की कुणाबद्दल बोलतोय हे त्याला कळेना .
" क्रिप्टो कॉईन एक्स … आठवला का ? "
"काय ? काय बोलतोयस तू ? " सोफ्यावर नीट सावरून बसत अमरने अविश्वासाने विचारलं .
" अमर साहेब , जागे झाले की नाही ? मी सांगतो की , ओमी मिरचंदानी मेला आहे ... आणि आपले पैसे पण मेले त्याच्याबरोबर… ! " पलीकडून फिरोज हिंदी सोडून मराठीवर आला आणि अमर ताडकन उठून बसला . त्याच्या डोळ्यावरची झोप आता कुठच्या कुठे उडून गेली होती . एक अनामिक भिती त्याला जाणवली.
" काय बोलतोय तू ? आपले पैसे कसे जातील ? "
" ते काय माहीत नाय , पण आतली खबर हाय की जेवढ्या लोकांनी पैसे लावले होते ते सगळे बुडाले … "
" अरे देवा ... बातमी खरी आहे का पण ? " अमरने पुन्हा एकदा खात्री करून घेण्यासाठी विचारलं .
" एक हजार एक टक्का ... लै मोठा झोल झालाय असा वाटतोय ... माझ्यावर विश्वास बसत नाही तर अजून पाच घंट्यांनी सकाळच्या बातम्या बघा , तुमची तसल्ली होऊन जाईल ... " म्हणत फिरोजने फोन कट केला . अमरच्या कानांवर विश्वास बसत नव्हता . त्याचा घसा सुकल्यासारखा वाटला त्याला . त्याने बाजूच्याच जार मधून ग्लासात पाणी ओतलं आणि तो घाटघट पाणी पिऊ लागला. ओमी मिरचंदानी , 30 वर्षांचा तो तरुण अचानक मेला ? कसं शक्य आहे ? आता आपलं काही खरं नाही . आपण मेलो आता , गुंतवलेले सगळे पैसे गेले ते वेगळंच ! , पण तो वाघचौरे काय आता आपल्याला सोडणार नाही ... अमर डोक्याला हात लावून सोफ्यावर रेलून बसला .... आता काही त्याला झोप येईल असं वाटत नव्हतं . त्याला खूपच अस्वस्थ वाटू लागलं. तो उठला , बाजूच्या कपाटात ठेवलेली रमची बॉटल काढली आणि एक लार्ज पेग बनवला .
क्रमश :
समजलं नाही Follow करेन पण
समजलं नाही
Follow करेन पण
आधी वाटले बिट कॉइन संबधी आहे.
शीर्षक वाचून वाटले बिट कॉइन संबधी आहे. त्यात क्रमशः आहे म्हणजे पुढील भागाची वाट पाहणे आलेच !
खूप दिवसांनी तुमची कथा आली
खूप दिवसांनी तुमची कथा आली इथे.
सुरवात चांगली आहे.
Crypto Currency बद्दल कथा!
Crypto Currency बद्दल कथा! रोचक !