भुंगा...

Submitted by अज्ञातवासी on 28 August, 2019 - 01:00

सकाळ झाली मी उठलो.
तसंही सकाळी सगळेच उठतात.
आरशात चेहरा बघून दोन तीन थपडा लगावल्या स्वतःला. तेवढीच एक जागेपणाची फिलिंग.
समोरच्या खिडकीत ती दिसतेय का?
आजकाल दिसतच नाही जास्त.
सुंदर आहे ती, एंगेज असेल बहुतेक कुणाला.
सुंदर फुलावर भुंगे जास्त फिरतात.
चला, निघा लवकर. कामावर जायचंय.
फ्रिजरही खचाखच भरलंय, साफ करायचंय...
मी खसाखसा दात घासले, फ्रिजर साफ केलं. अंघोळ केली. गार पाण्यानेच. ताजा हो ले...
चहा तर मी घेत नाहीच.
अरे, अजूनही तिची खिडकी बंद कशी, आतापर्यंत एकदातरी उघडायला हवी होती.
साला, आपला दिवस वाईट जाणार आज...
जाऊन बघावं काय?
जाऊन करणार काय? ओळख ना पाळख.
मी आवरलं, आणि निघालो. कुलूप दोन - तीनदा ओढून बघितलं. पॅक लागलं.
आजकाल चोऱ्या जास्त होतात. पैशापायी लोक एकमेकांचा जीव घेतील. घोर कलियुग...
अरे यार... आज कचरा कुठे टाकणार... विचारच केला नाही...
मरू दे, नदीतच टाकतो. नदी... सगळं पवित्र करते...
मी नदीकडे निघालो...
★★★★★
संध्याकाळी मी परत आलो.
दार उघडतानाच शेजारचे लेले आले. सोसायटी टाइम्स.
अहो कळलं का? समोरच्या बिल्डिंगमध्ये आज पोलीस आले होते. एक मुलगी बेपत्ता आहे तीन दिवसांपासून. मागच्या महिन्यासारखीच केस...
देवा घोर कलियुग...
मी सुन्न मनाने मध्ये आलो, सोफ्यावर अंग लोटलं.
साली हीसुद्धा तिच्यासारखीच एंगेज निघाली, आमच्यासारख्याची काही किंमतच नाही...
तसंही सुंदर फुलावर भुंगे जास्त फिरतात...
...आणि काही भुंगे फुलं पोखरतातही...

विषय: 
साहित्य
Groups audience: 
गुलमोहर - कथा/कादंबरी
Group content visibility: 
Public - accessible to all site users
शेअर करा

> निवेदकानेच तिला मारून फ्रिजरमधे 3 दिवस ठेवलं होतं की काय? > हो आणि तुकडे हळूहळू नदीत टाकून देतोय आणि हे त्याने याआधीदेखील केले आहे.

चैतन्यने लिहलेली गारेगार आठवली.

Submitted by ॲमी on 28 August, 2019 - 10:53

भयंकर आहे. कमी शब्दात छान लिहिली आहे. शेवटचे वाक्य वाचून संशय आला, मग प्रतिसाद वाचले आणि मग फ्रीजरवाला भाग परत वाचला.

Submitted by चंपा on 28 August, 2019 - 12:45

तुम्हाला जास्त लिहिण्याचा कंटाळा आहे का हो, म्हणून कमीत कमी शब्दात जास्तीत जास्त प्रभाव पाडण्याकडे तुमचा कल असतो? Wink
शॉर्ट फिल्म बघितल्याची फिलिंग येतेय.
पुढच्या कथा कधी...?

Submitted by .Raw. on 30 August, 2019 - 02:43

भयंकर
आधी पार्ट 2 वाचून ही वाचली.मस्त.
अश्या अजून लिहा.

Submitted by mi_anu on 31 August, 2019 - 02:38