पूर्वीची मी ..... आताची मी

पूर्वीची मी साधा विनोद ऐकला तरी फिदीफिदी हसत असे
उंचावरून कोसळणाऱ्या धबधब्याप्रमाणे खळाळून वाहत असे ।
आता अख्खी विनोदी गोष्ट वाचली तरी हसू येत नाही
कुणी खिंकाळून हसलं तर आवडतही नाही ।।

पूर्वीची मी भुक्कड अशी खादाडी करत हिंडत असे
बिनधास्तपणे रस्त्यावर भैयाकडची पाणीपुरी हाणत असे ।
आताशा चटपटीत चाट हायजिनिक वाटत नाही
कुणी खात असेल तर आवडतही नाही ।।

पूर्वीची मी कुठलाही विषय घेऊन अखंड बडबड करत असे
अनंतकाळ वाहणाऱ्या वाऱ्याप्रमाणे वाचा यज्ञ करत असे ।
आता चुकूनही जास्त बोलायला आवडत नाही
कुणी बडबडत असेल तर आवडतही नाही ।।

पूर्वीची मी सदासर्वदा मित्रमैत्रिणी जोडत असे
जिवाभावाच्या मोठ्या फ्रेंड्सग्रुप मध्ये वावरत असे ।
आता नवीन कुणाशी मैत्री करण्यास मन धजावत नाही
कुणी हात पुढे केला तर आवडतही नाही ।।
-------------------------------------------------------------------------------------------------------
का कोण जाणे, गेल्या काही दिवसांत उदास वाटत आहे. स्वच्छ आकाशावर ढगांचं मळभ दाटून आल्यासारखं!
त्या उदासीनतेत वरील शब्द सुचलेत, कविता समजून सहन करा.
मला कविता करता येत नाहीत हे तर आपण जाणताच!
लेखन निर्दोष असावे म्हणून काही चुका असतील तर नक्की सांगा.
-------------------------------------------------------------------------------------------------------
**किल्ली**
-------------------------------------------------------------------------------------------------------