मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
आषाढी एकादशी
माऊली आलो माहेरी, मुखे म्हणता हरी हरी
मायबाप तुमचे द्वारी, पंढरी आम्हा पुण्यनगरी ||धृ||
आषाढी एकादशीचा, दिन आला सोनियाचा
साधुसंत झाले गोळा, विठुरायाचा हा सोहळा ||१||
एकादशीच्या पवित्र वारी, सजली पंढरपुरनगरी
दिंड्या पताका भरमार, घुमतो विठुरायाचा गजर ||२||
वारकऱ्यांचा पूर लोटला, चंद्रभागेच्या तीरा
बेहोष नाचती भक्तजन, घोष गेला दिगंतरा ||३||
विठू माऊली तुझे राऊळी, उभा आतुर भक्त वृंद
वारकरी आम्ही साधे भोळे, आम्ही ना साधुसंत ||४||
गळ्यात शोभे तुळशीमाळा, भाळी बुक्का काळा
शिरी वृंदावन डोलती, पाऊले तालात पुढे चालती ||५||
घुमे टाळ मृदुंगाची धून, लावी ब्रह्मानंदी ध्यान
मन राहिले ना मन आमुचे, झाले विठ्ठलाचे धन ||६||
साध्या भोळ्या भक्तांचा, कारे पाहशी अंत?
दर्शनासी तुझ्या आलो, देवा व्हावे कृपावंत ||७||
नाही कधी चुकली वारी, धावत आलो पंढरपुरी
एकादशी कडकडीत करी, पूजा तुझी नित्य घरी ||८||
आम्ही गरीब भक्त देवा, भक्तीभावच आमचा ठेवा
मानून घे आमची सेवा, आता जातो आमच्या गावा ||९||
प्रा.अरुण सु.पाटील (असु)
छान आहे !
छान आहे !