असोशी विठूची

Submitted by दत्तात्रय साळुंके on 27 June, 2018 - 06:06

असोशी विठूची

देव नाही गाभाऱ्यात
ओस झाले मंदिरही
सुनी सुनी पायरीही
दैन्य आले कळसाही

दिंडी घेऊनीया विठू
प्रगटला भिमातीरी
टाळ मृदंग गजरी
विठू झाला वारकरी

चंद्रभागेच्या जळात
भक्ती तरंग उठतो
नाथ तीथे अनाथांचा
वारकऱ्यासंगे न्हातो

युगे युगे ताटातूट
जीव नाही की थाऱ्याला
भाग गेला शीण गेला
कृष्ण सुदामा भेटला

विठू देहात भरला
विठू अष्टगंध टिळा
विठू तुळशीची माळ
विठू सर्वांग सोहळा

© दत्तात्रय साळुंके

विषय: 
काव्यलेखन
शब्दखुणा: 
असोशी
विठू
Groups audience: 
गुलमोहर - कविता
Group content visibility: 
Use group defaults
शेअर करा