कोलेस्टेरॉल : एक लाडावलेला वलयांकित पदार्थ !

Submitted by कुमार१ on 5 November, 2017 - 19:48

गेल्या अर्धशतकात आपण वाढत्या प्रमाणात आधुनिक जीवनशैलीचा स्वीकार केला आणि त्याबरोबर आपल्या आयुष्यातील ताणतणाव देखील वाढत गेले. एकीकडे आपला भौतिक विकास होत असतानाच आपले शरीर मात्र निरनिराळ्या आजारांची शिकार होत गेले. हृदयविकार हा त्यापैकी एक प्रमुख आजार. त्याचे एक महत्वाचे कारण म्हणजे करोनरी रक्तवाहिन्यांमध्ये मेद-पदार्थांच्या गुठळ्या होऊन त्या आकुंचित होणे. त्याचा पुढील परिणाम म्हणजे माणसाला येणारा “हार्ट अ‍ॅटॅक ” हा होय. या विकाराचा आपल्या रक्तातील ‘कोलेस्टेरॉल’च्या वाढलेल्या प्रमाणाशी घनिष्ठ संबंध असतो हे आपण सगळे जाणतोच.

सध्या सुशिक्षित समाजात या ‘कोलेस्टेरॉल’ बद्दलचे सामान्यज्ञान खूप वाढलेले जाणवते. ‘तूप जास्ती खाउ नका’, ‘मांसाहार टाळलेला बरा’, ‘शून्य कोलेस्टेरॉल’वाले तेल कोणते’, ‘ट्रान्स फॅट म्हणजे काय’ अशा एक ना अनेक चर्चा वारंवार होत असतात आणि आपण एकमेकाला यासंबंधीचे भरपूर अनाहूत सल्ले देत असतो. त्यामुळे ‘कोलेस्टेरॉल’ हा एक लाडावलेला वलयांकित पदार्थ होऊन बसलाय! तर अशा या कोलेस्टेरॉलचा इतिहास, त्याच्या संशोधनातील प्रगती आणि हृदयविकाराशी असलेले त्याचे नाते या सगळ्याचा लेखाजोखा आपल्यासमोर सादर करीत आहे.

आपल्यातील बऱ्याच जणांना असे वाटते की कोलेस्टेरॉल हे गेल्या साठेक वर्षांत उपटलेले एक खूळ आहे. “आमच्या आजोबांच्या पिढीने हे असले काही ऐकले नव्हते बुवा. तेव्हा लोक कसे दणकून खात पीत होते”, अशी विधानेही आपल्या कानावरून वरचेवर जात असतात. परंतु कोलेस्टेरॉलचा शोध तसा फार जुना आहे हे लक्षात घेतले पाहिजे.

इ.स. १७५८ मध्ये Francois P. de La Salle या फ्रेंच डॉक्टरने कोलेस्टेरॉलचा शोध लावला. तेव्हा ते पित्ताशयातून बाहेर काढलेल्या खड्यांचा (gallstones) अभ्यास करीत होते. त्यातून त्यांनी एक घट्ट मेद पदार्थ शोधून काढला. पुढे १८१५ मध्ये फ्रेंच रसायनशास्त्रज्ञ Michel E. Chevreul यांनी तो घट्ट पदार्थ शुद्ध स्वरूपात प्राप्त केला आणि त्याला ‘कोलेस्टेरॉल’ हे नाव दिले. ‘कोलेस्टेरॉल’ हा ग्रीक शब्द असून chole = bile =पित्त आणि stereos = solid अशी त्याची व्युत्पत्ती आहे. मग या नव्या पदार्थावरील संशोधनाने वेग घेतला.

सर्व प्राण्यांच्या पेशींमध्ये तो असतो हे लक्षात आले. पुढे १८३८ मध्ये Louis Rene Lecanu यांनी संशोधनातील एक महत्वाचा टप्पा गाठला आणि असे दाखवून दिले की कोलेस्टेरॉल हा आपल्या रक्तातही आढळतो. तरीही कोलेस्टेरॉलची ओळख अजून ‘पित्तात आणि रक्तात आढळणारा एक घट्ट मेद’ एवढीच होती. त्याचे रासायनिक सूत्र वगैरे अद्याप माहित नव्हते.
१९०३ मध्ये Adolf Windaus या जर्मन शास्त्रज्ञाने खूप प्रयत्नांती कोलेस्टेरॉलचे रासायनिक सूत्र शोधून काढले. त्याबद्दल ते १९२८ च्या नोबेल पारितोषिकाचे मानकरी ठरले. पुढे १९३० मध्ये Heinrich Wieland यांनी Windaus च्या संशोधनातील काही चुका दुरुस्त करून कोलेस्टेरॉलचे पक्के सूत्र जाहीर केले. कोलेस्टेरॉल हा ‘स्टीरॉइड’ गटातील एक मेद असल्याची नोंद झाली.
त्यानंतर आजपावेतो कोलेस्टेरॉल संबंधीचे संशोधन सतत चालू आहे. त्यातून त्याचे नवनवे पैलू समजून येत आहेत. आतापर्यंत १३ वैज्ञानिकांनी या पदार्थावरील संशोधनासाठी नोबेल पारितोषिके प्राप्त केली आहेत. असे भाग्य शरीरातील एखाद्या घटकाच्या वाट्याला क्वचितच आले आहे.

आता आपल्या शरीराच्या दृष्टीतून कोलेस्टेरॉलकडे बघूयात. हा पदार्थ आपल्याला फक्त प्राणिज पदार्थांच्या सेवनातून मिळतो तसेच आपल्या शरीरातही तो तयार होतो. या दोन्ही स्त्रोतांचा शरीरात प्रतिदिन समतोल साधला जातो. म्हणजे, जर आपल्या आहारात त्याचे प्रमाण कमी असेल तर शरीरात तो अधिक तयार केला जाईल आणि आहारात जास्त असेल तर शरीरात कमी प्रमाणात तयार होईल. कुठल्याही वनस्पतीमध्ये कोलेस्टेरॉल नसते. त्यामुळे ‘व्हेगन’ आहारशैलीत अन्नातून ते शरीराला मिळणार नाही.
भारतात आपण जी तेले स्वयंपाकासाठी वापरतो ती बहुतांश वनस्पतीपासून केलेली असतात जसे की, शेंगदाणे, करडी, सूर्यफूल, जवस, ओलिव्ह इ. त्यामुळे या सर्व तेलांच्या जाहिरातीत “ शून्य कोलेस्टेरॉल तेल” असे जे ठळकपणे दाखविलेले असते, ती खरे तर ग्राहकांची दिशाभूल आहे (म्हणजे ‘पिवळा पितांबर’ म्हटल्यासारखा तो प्रकार आहे). कारण कुठलाही वनस्पतीजन्य पदार्थ हा “शून्य कोलेस्टेरॉलयुक्तच” असतो. त्या तेलांची एकमेकाशी तुलनाच करायची झाली, तर त्यांमध्ये कशात एकूण उष्मांक आणि संपृक्त मेदाम्ले (saturated fatty acids) कमी/जास्त आहेत, यावरून केली पाहिजे.

सध्या विविध माध्यमांतून ‘कोलेस्टेरॉल आणि हृदयविकार’ या विषयावरील माहितीचा सतत भडीमार आणि काथ्याकूट चालू असतो. त्यामुळे सामान्य माणसाचा कोलेस्टेरॉलकडे पाहण्याचा एक पूर्वग्रह झालेला आहे. जसे काही कोलेस्टेरॉलला आपण आरोपीच्या पिंजऱ्यात उभे करतो आणि मग पूर्वग्रहदूषित नजरेने त्याच्याकडे पाहतो. त्यामुळे सामान्य माणसाला या कोलेस्टेरॉलच्या शरीरातील उपयुक्ततेची काही जाणीवच नसते. क्षणभर आपण ‘रक्तातील वाढलेल्या कोलेस्टेरॉलचे परिणाम’ हा विषय बाजूला ठेवू आणि आपल्या पेशींमध्ये जे कोलेस्टेरॉल आहे ते किती उपयुक्त आहे ते पाहूयात.

आपल्या शरीरातील पेशींमध्ये कोलेस्टेरॉलपासून कितीतरी महत्वाची संयुगे तयार होतात. त्यापैकी तीन महत्वाची अशी:
१. त्वचेतील कोलेस्टेरॉलवर सूर्यकिरण पडले की त्यापासून ‘ड’ जीवनसत्व तयार होते.

२. कोलेस्टेरॉलपासून सगळी ‘स्टीरॉइड हॉर्मोन्स’ तयार होतात. या हॉर्मोन्सचे एक मोठे कुटुंबच आहे. त्यापैकी पुरुषातील testosterone आणि स्त्रीतील estrogen ही आपल्या अगदी परिचयाची. किंबहुना या दोघांमुळेच आपले पुरुषत्व वा स्त्रीत्व सिद्ध होते आणि आपण ते मिरवत असतो!

३. यकृतात त्याच्यापासून होणारी जी आम्ले (bile acids) आहेत ती अन्न्पचनात मोलाची मदत करतात.

आपल्या रक्तातही कोलेस्टेरॉल संचार करीत असते. त्यातील काही भाग हा रक्तवाहिन्यांच्या आतील आवरणावर हळूहळू साठत असतो. त्या साठ्यांमध्ये कोलेस्टेरॉलबरोबरच इतरही काही मेद असतात. जेव्हा रक्तातील कोलेस्टेरॉलचे प्रमाण नियंत्रित असते तेव्हा हे साठे अतिशय मंदगतीने वाढतात आणि त्यामुळे रक्तप्रवाह हा विनाअडथळा व्यवस्थित चालू राहतो. पण जर का रक्तातील मेदपदार्थ हे प्रमाणाबाहेर वाढले तर मात्र ही साठण्याची प्रक्रिया खूप मोठ्या प्रमाणात होते. यालाच atherosclerosis असे म्हणतात. या आजाराचा सर्वप्रथम शोध Rudolf Virchow यांनी १८५४मध्ये लावला. हा आजार जेव्हा करोनरी रक्तवाहिन्यांमध्ये होतो तेव्हा त्या आकुंचित पावल्याने किंवा ‘ब्लॉक’ झाल्याने त्या रुग्णास ‘हृदयविकाराचा झटका’ येतो. अशा प्रकारच्या ‘झटक्यांची’ वैद्यकशास्त्रात प्रथम नोंद १९१०च्या सुमारास झालेली दिसते.

आपल्या रक्तात संचार करणारे कोलेस्टेरॉल हे काही मोठ्या रेणूंच्या माध्यमातून फिरत असते. त्यातील दोन मुख्य रेणू म्हणजे LDL & HDL. LDLमध्ये जे कोलेस्टेरॉल असते त्याला “वाईट” कोलेस्टेरॉल, तर HDLमधल्याला “चांगले” कोलेस्टेरॉल असे सामान्य भाषेत म्हणतात. आता हे ‘चांगले आणि वाईट’ हे शब्द शास्त्रीयदृष्ट्या तितकेसे योग्य नाहीत. LDL मधले कोलेस्टेरॉल जर नेहमी योग्य प्रमाणात राहिले तर तसे ते आपल्याला ‘वाईट’ ठरत नाही. केवळ ‘चांगले’ चा विरुद्ध शब्द म्हणून तो प्रचलित आहे. त्याचे प्रमाण वाढते राहिल्यासाच atherosclerosis चा धोका संभवतो. तेव्हा त्या दोन्ही शब्दांचा अर्थ ढोबळमानाने घ्यायचा आहे.

आता वळूयात “कोलेस्टेरॉल आणि करोनरी हृदयविकार” या बहुचर्चित आणि वादग्रस्त विषयाकडे. विसाव्या शतकाच्या मध्यापासून हा विषय वैद्यकविश्वात सतत प्रकाशझोतात राहिला आहे. १९५३मध्ये Ancel Keys यांनी अनेक प्रयोगांती असे मत मांडले की आहारातील मेदाचे जास्त प्रमाण आणि करोनरी हृदयविकार यांचा घनिष्ठ संबंध आहे. त्यावर वैज्ञानिकांत बऱ्याच चर्चा झडल्या आणि त्यांचे मतभेदही चव्हाट्यावर आले. त्यांमध्ये John Yudkin या मधुमेहतज्ञांचे ठाम मत होते की आहारातील मेदापेक्षाही साखर हा अधिक घातक पदार्थ आहे. मग Keys आणि Yudkin यांच्यात बऱ्याचदा वैचारिक खडाजंगी झाली. त्यात अखेर Yudkin ना नमते घ्यावे लागले आणि Keys यांचे मत वैद्यकविश्वाने उचलून धरले.

१९५६मध्ये अमेरिकी हृदयविकार संघटनेने अधिकृतरीत्या जाहीर केले की आहारात बटर, अंडे आणि बीफ यांच्या अतिसेवनाने करोनरी हृदयविकाराचा धोका वाढतो. इथपासून ‘आहार आणि हृदयविकार’ या चर्चेला एक निर्णायक वळण लागले. किंबहुना, एक प्रकारे कोलेस्टेरॉलचे 'भूत' समाजाच्या मानगुटीवर बसले! त्यानंतर रक्तातील वाढलेल्या कोलेस्टेरॉलला जाणीवपूर्वक ‘लक्ष्य’ करून ते कमी करण्यासाठी अनेक उपचारपद्धती विकसित झाल्या. स्वयंपाकात कोणते तेल वापरायचे याच्या जोरदार प्रचारमोहीमा चालू झाल्या. एक दोन दशके तर सूर्यफुलाचेच तेल कसे सर्वोत्तम आहे हे ठसवणाऱ्या जाहिरातींचा सुळसुळाट झाला होता.

दुसऱ्या बाजूस वैज्ञानिकांचा एक गट हा सातत्याने फक्त कोलेस्टेरॉलला ‘लक्ष्य’ करण्याच्या विरोधात होता. त्यांच्या मते आहारातील साखर, रक्तातील अन्य एका मेदाचे (triglycerides) प्रमाण, जीवनशैली यासारखे इतर अनेक घटकही atherosclerosis होण्यास कारणीभूत होते. त्यामुळे निव्वळ कोलेस्टेरॉल कमी करण्याचे उपाय राबवणे ही त्या रुग्णांची दिशाभूल करणारे आहे, असे त्यांचे मत होते. १९७७मध्ये George Mann यांनी तर ‘आहार आणि करोनरी हृदयविकार’ हे गृहीतक म्हणजे वैद्यकाच्या इतिहासातील सर्वात मोठी बनवाबनवी (scam) असल्याचे मत नोंदवले होते.

अशा तऱ्हेने ‘कोलेस्टेरॉल आणि हृदयविकार’ या वादग्रस्त विषयावरील काथ्याकूट आजही चालू आहे. त्याच्या बाजूने आणि विरोधात विविध वैद्यकीय संघटना आग्रही मते मांडीत आहेत. १९८७पासून रक्तातील कोलेस्टेरॉल कमी करणारी ‘Statins’ नावाची औषधे बाजारात उपलब्ध असून त्यांचा मोठ्या प्रमाणात वापर होत आहे. कोलेस्टेरॉलप्रमाणेच तीसुद्धा वादाच्या भोवऱ्यात सापडली आहेत. त्यांचे समर्थक आणि विरोधक आपापली मते सतत हिरीरीने मांडत असतात (अगदी नोटबंदी या विषयासारखी!). किंबहुना चर्चेसाठी हा विषय माध्यमांत वारंवार उकरून काढला जातो.

करोनरी हृदयविकाराच्या कारणांच्या बाबतीत अशा प्रकारचे वाद होणे अगदी स्वाभाविक आहे. मुळात हा आजार कोणत्या एका कारणामुळे होत नसतो. अनुवंशिकता, वांशिकता, जीवनशैली, व्यसने, मधुमेह आणि रक्तातील विविध मेदांचे प्रमाण असे अनेकविध घटक तो होण्यास कारणीभूत ठरतात( multifactorial disease). त्यामुळे त्यापैकी एका घटकाचा नक्की ‘वाटा’ किती हे ठरवणे खरेच अवघड असते. जेव्हा आपण आहारातील मेदांचे विश्लेषण करतो, तेव्हा फक्त कोलेस्टेरॉलकडे न बघता एकूण संपृक्त मेदांच्या (saturated fats) प्रमाणाकडे लक्ष दिले पाहिजे. त्याचबरोबर नियमित व्यायाम आणि धूम्रपानापासून अलिप्तता हेही घटक आजार प्रतिबंधाच्या दृष्टीने तेवढेच महत्वाचे आहेत.

आता एवढे सगळे पुराण सांगितल्यावर वाचक मला एक प्रश्न नक्की विचारतील. तो असा, “मग काय, रक्तातील वाढलेले कोलेस्टेरॉल हा काळजी करण्याचा विषय आहे की नाही?” मी याचे उत्तर एका सोप्या उदाहरणाने देतो. समजा, तुम्ही खूप लांब पल्य्याच्या आणि बऱ्याच दिवसांच्या प्रवासास निघाला आहात. या काळात तुम्ही अंगावरती अगदी नजरेत भरतील असे काही लाख रुपयांचे दागिने घातले आहेत. आता प्रवासादरम्यान हे दागिने हमखास चोरले जातील का? इथे हो किंवा नाही अशा दोन्ही शक्यता आहेत. पण, ते दागिने तुम्ही चोरांच्या नजरेत ठेऊन एक मोठी जोखीम नक्कीच पत्करली आहेत. त्याचप्रमाणे रक्तातील वाढलेले कोलेस्टेरॉल ही आयुष्याच्या प्रवासातील एक जोखीम नक्की आहे. पण, त्यामुळे ‘करोनरी हृदयविकार होईलच’ असे विधान मात्र करता येत नाही.

....तर असा हा भरपूर संशोधन झालेला, बहुचर्चित, बहुगुणी आणि वादग्रस्त कोलेस्टेरॉल! आरोग्यविज्ञान क्षेत्राशी संबंध नसलेल्या कोणाही सामान्य माणसाला त्याची मूलभूत माहिती व्हावी या उद्देशाने हा लेख लिहीला आहे. त्यावरील प्रतिसाद आणि शंकांचे स्वागत आहे.
******************************************************

विषय: 
Group content visibility: 
Public - accessible to all site users

मी बिंदास साजूक तूपात खाते. गोड,मैदा , भात आणि ब्रेड पुर्ण बंद. वजन माझेतरी कमी झालय.

माझ्या समजानुसार आणि जे मी आता फॉलओकरतेत, फक्त टोटल कोलेस्टेरॉल आणि "एल डी एल" (सीरम मधले) कमी ठेवायचे आणि एच डी एल हाय ठेवायचे.

डॉ मिलिंद वाटवे यांच्या विज्ञानातील अंधश्रद्धा या व्याख्यानात मी हाही विषय ऐकला होता. गोडेतेल पुर्ण वर्ज्य फक्त करडई तेल तेही अतिशय कमी प्रमाणात हा सल्ला खूप वर्षे हृदयविकार ग्रस्त लोकांना दिला जायचा. सफोला च्या जाहिराती तर अशा होत्या की जणू तुम्ही आमच्या व्यतिरिक्त अन्य तेल खाल्ल तर मेलाच म्हणुन समजा असे भय दाखवणार्‍या होत्या.
बर्‍याचदा आरोग्य पुरवण्यांमधे जागरुकता या नावाखाला भय दाखवण्याचे काम केले जाते व रुग्णाला कायम दडपणाखाली ठेवले जाते. जर काही बरवाईट झाल तर बघा आम्ही सांगितल होत तुम्ही ऐकल नाही. नाही झाल तर आम्ही जागरुकता निर्माण करतो, तुमच्या आरोग्याची काळजी घेतो त्यामुळे तुम्ही सुरक्षित आहात. शेवटी कुठलाही व्यवसाय हा भय व स्वप्न या तत्वांवर चालतो. वैद्यकीय व्यवसाय त्याला अपवाद असत नाहि.

अंकु, आभार
काही शंका असल्यास त्या अनुषंगाने लिहिता येईल

कोलेस्टेरॉलने काही होत नसते.फार्मा इंड्स्ट्रीने पसरवलेल्या अनेक गल्लाभरु मिथकापैकी हे एक आहे. आमचा आजोबा घाण्याचे गोडेतेल (रिफांईंड नसलेले) खाऊन ९० वर्ष जगला,मरोस्तोर त्याच्या करोनरीज मोकळ्या होत्या.कारण त्याला कसलेच सिंप्टम्स न्हवते.

डॉक्टरसाहेब, चांगली माहिती. लेखात आलेल्या ओझरत्या उल्लेखा नुसार अमेरेकिन हेल्थ असोसिएशन ने आता खाद्यपदार्थातल्या कोलेस्टेरॉलला हृदयविकारास कारणिभुत होणार्‍या घटकांच्या बॅड बॉय्ज लिस्टमधुन काढुन टाकलेलं आहे...

रमद, आभार. तुमचे प्रतिसाद नेहमीच उत्साहवर्धक असतात.
राज, आभार. बरोबर माहिती. फक्त अजूनही सर्व वैद्यक जगताचे यावर एकमत होत नाही.
तसा हा विषय गुंतागुंतीचा आहे.

शुगर इज द न्यु इवल.

मी एका कन्फेक्शनरी उत्पादकांच्या वरिष्ठ अधिकारी वर्गासोबत एका मिटींगमध्ये होतो. ते म्हणाले की आमचे मुख्य प्रतिस्पर्धी इतर गोळ्या-चॉकोलेट बनवणारे उत्पादक नसून 'साखरची बदनामी करणारे वैज्ञानिक शोधनिबंध' आहेत

मात्र आहारातील कशाचाही अतिरेक हा अयोग्यच असतो हे मूलभूत सत्य आहे.
एखादा पदार्थ आणि आजार यांचा कार्यकारणभाव हा वादग्रस्त मुद्दा असतो.

साखर सब फसाद की जड आहे हा शोध साठच्या दशकात कन्फेक्शनरीज, खाद्यपदार्थवाल्यांनी पैसे चारुन दाबून टाकला म्हणे. आणि पैसे चारुनच कोलेस्टरोल, तेल, मसाले वगैरे गोष्टींना बदनाम केले.

साखर आणि गहू सध्या हिटलिस्टवर आहेत.

चांगली माहिती..
सोप्या भाषेत समजवून सांगितल्याबद्दल धन्यवाद..
अजून वाचायला नक्की आवडेल

सुंदर. माहितीपूर्ण आणि ओघवता लेख. >>>> +१
ते दागिन्यांचे उदाहरण खूप आवडले.
तुमच्या मागच्या 'इन्सुलिन' वरील लेखाप्रमाणेच हाही लेख रोचक आहे.
पुलेशु !

चांगला लेख.
साखर, ग्लुटन आणि रेड मीट सध्या हिट लिस्ट वर आहे. कुठलाही अतिरेक वाईट+१

मी नुकतेच माझ्या एका चुलत भावाला व काकाला या रोगाने गमावलेय. त्याचे असह्य दुःख तर आहेच पण या घटनांमुळे मी संभ्रमित झालेय. ते दोघे वर्षानुवर्षे जे खात होते तेच खात असलेली आणि शारीरिक श्रमाचे काम जास्त न करणारी आजी आज 90ची आहे (टच वुड) आणि कामाच्या ठिकाणी जाण्यासाठी रोज सायकलचे 4 किमी रनिंग करणारा भाऊ मात्र शिकार व्हावा याचे कारण कळत नाही. बाह्य परिस्थिती सारखी असताना एक व्यक्ती स्वस्थ व दुसरी आजारी याचे कारण काय? हे जर जीन्समध्ये दडले असेल तर मग उगीच आयुष्य भर नियमन करून तरी काय उपयोग? होणारे अटळ आहे.

या आजाराबद्दलची माझी काही निरिक्षणे /अनुभव :

१. यात जनुकीय घटकांचा वाटा खूप मोठा आहे. त्यामुळे अनुवंशिकता असणाऱ्या व्यक्तींनी आहारनियमन, व्यायाम, तंबाकू पासून दूर राहणे हे जरूर करावे. फायदा होतो.

२. जिथे अनुवंशिकता नाही, जीवनशैली काहीशी निवांत आहे, अशांनी बिंधास खावेप्यावे, मजा करावी वगैरे.

३. उच्च कोलेस्टेरॉल हे जर अनुवंशिक आजाराने असेल (Familial hypercholesterolemia) तर औषधांचा चांगलाच उपयोग होतो. अशा काहींमध्ये एकूण कोलेस्टेरॉलचे प्रमाण हजाराच्या घरात सुद्धा जाऊ शकते. इथे औषधे ही वरदानच आहेत.

४. “ते विज्ञान वगैरे जाउद्यात, कशात काही अर्थ नसतो, होणारे अटळ असते, आपल्या हातात काही नाही” असे निराशावादी सूर मी तरी काढीत नाही.

मी नुकतेच माझ्या एका चुलत भावाला व काकाला या रोगाने गमावलेय. त्याचे असह्य दुःख तर आहेच पण या घटनांमुळे मी संभ्रमित झालेय. ते दोघे वर्षानुवर्षे जे खात होते तेच खात असलेली आणि शारीरिक श्रमाचे काम जास्त न करणारी आजी आज 90ची आहे (टच वुड) आणि कामाच्या ठिकाणी जाण्यासाठी रोज सायकलचे 4 किमी रनिंग करणारा भाऊ मात्र शिकार व्हावा याचे कारण कळत नाही. बाह्य परिस्थिती सारखी असताना एक व्यक्ती स्वस्थ व दुसरी आजारी याचे कारण काय? हे जर जीन्समध्ये दडले असेल तर मग उगीच आयुष्य भर नियमन करून तरी काय उपयोग? होणारे अटळ आहे.>>>
स्ट्रेस सुद्धा कारणीभूत असतो, नविन रिसर्च प्रमाणे बरेचसे आजार स्ट्रेस ने होतात. ती आजी मोबाइल, संगणकासमोर बसुन डोकं भडकवणारे स्ट्रेस वाढणारे मेसेज वाचत नसणार, तर नातवांबरोबर, समवयस्क लोकांबरोबर गप्पा मारत असणार (ग्रेट स्ट्रेस बस्टर).

अग्निपंख, सहमत.
आताचे वय ८० च्या पुढचे आणि पन्नाशीतले यांची तुलना गैरलागू आहे. इतका जीवनशैलीत फरक पडला आहे.

मी वैद्यकीय शिक्षण घेत असताना साधारण साठीतला माणूस हृदयविकाराच्या झटक्याने दगावत असे.
आता आपण अगदी तरुण वयातील माणूस सुद्धा दगावलेला पाहतो. हे प्रमाण भारतीयांमध्ये तर जास्तीच आहे.

आम्ही लहान असताना घरी फक्त शेंगदाण्याचेच तेल वापरले जाई. इतर कुठले तेल आम्ही ऐकलेही नव्हते.
आता जेव्हा मॉलला खरेदीस जातो तेव्हा ५-६ प्रकारची तेले पाहून गांगरुन जातो. प्रत्येकाबद्दल काहीबाही ऐकलेले वा वाचलेले असते. मग नक्की कळत नाही कुठले घ्यावे ते.
कुमार१, आपण याबद्दल सांगाल का?

Pages