मोड आलेल्या मुगाचे स्टफ्ड पराठे

Submitted by मंजूडी on 27 July, 2013 - 02:13
प्रत्यक्षात लागणारा वेळ: 
३० मिनिटे
लागणारे जिन्नस: 

सारणासाठी:

१. हिरवे मूग - दोन ते अडीच वाट्या
२. एक मध्यम बटाटा उकडून
३. आमचूर पावडर किंवा चाट मसाला - १ चमचा
४. बडिशेपेची पावडर - १ चमचा
५. गरम मसाला - १ चमचा
६. जिर्‍याची पूड- १ चमचा
७. आलं आणि मिरची वाटून - दोन चमचे
८. तिखट, मीठ, साखर - चवीनुसार
९. चिरलेली कोथिंबीर - १ वाटीभर

पारीसाठी: कणीक, मीठ, तेल, पाणी.

क्रमवार पाककृती: 

१. मूग भरपूर पाण्यात भिजत घालून, मग पाणी उपसून त्याला मोड येऊ द्यावेत. या प्रक्रियेला साधारण अठरा तास लागतात. तो वेळ पाककृतीच्या वेळेत गणलेला नाही.

२. मोड आलेले मूग कुकरच्या क्षमतेप्रमाणे एक किंवा दोन शिट्या देऊन शिजवून घ्यावेत. मी वरण भाताबरोबर शिजवून घेतले. मुगात अजिबात पाणी घातले नव्हते. अगदी मऊ लगदा होईपर्यंत मूग शिजवायचे नाहीत. दाणा किंचीत टसटशीत राहिला पाहिजे.

३. मूग थंड झाल्यावर मिक्सरमधे भरडसर वाटून घ्यावेत.

४. ते भरड वाटण एका भांड्यात घेऊन मग त्यात सारणासाठी असलेले सर्व घटक एकेक करून घालून पराठ्याचे सारण नीट तयार करून घ्यावे.

moong paratha 1.jpg

५. स्टफ्ड पराठ्यांसाठी नेहमी भिजवतो तशी कणीक भिजवून घ्यावी.

६. तयार केलेलं सारण कणकेच्या पारीत भरून नेहमीसारखे पराठे लाटून, तव्यावर तेल सोडून भाजून घ्यावेत.

७. लोणी/ दही/ सॉस/ चटणीबरोबर गरमागरम गट्टम करावेत.

moong paratha.jpg
वाढणी/प्रमाण: 
दोन ते अडीच वाट्या मुगाचे साधारण १२ पराठे होतात.
माहितीचा स्रोत: 
तेलकट खस्ता कचोरी आणि आलू पराठे यांतील पौष्टिक सुवर्णमध्य
Group content visibility: 
Public - accessible to all site users

आत्तापर्यंत फक्त मो.मु.चे धिरडे केले होते. आता पराठे करुन बघेन.
बाकी पराठा न फाटता लाटलेला आहे(जे मला कधीही जमलेले नाही.) पराठा ईतका छान लाटणार्या ग्रुहिणींचे मला खुप कोतुक वाटते.

पिन्कि ८०, धन्यवाद!
पराठ्याची कणीक पोळीपेक्षा किंचीत सैल आणि अगदी मऊ तुकतुकीत भिजवली की पराठा व्यवस्थित लाटता येतो.

मस्त खमंग दिसतोय पराठा.:स्मित: माझी मुलगी उसळी खात नाही, पण कुठलेही पराठे तिला चालतात. हा पौष्टीक पराठा त्यात बटाटा पण ती असल्याने आवडीने खाईल.

पिंकी +१. माझाही परोठा लाटतांना फाटतो किंवा सारण डोकावत राहतं. Happy
मस्त रेस्पी आणि फोटू. थांकु.

आज केला आहे. यम्मी यम्मी झालाय.
मी सारणाच्या मिश्रणाला कढीपत्ता आणि हिंगाची फोडणी दिली.
मस्त खमंग पराठा झाला आहे.
थँक्यु मंजुडी Happy

Pages