देवबाग-धामापूर

नवीन वर्षाची सुरुवात छानस्या ट्रीपने करावी असा विचार आला असतानाच सौरभच्या देवबाग ट्रीपचे फोटो पाहायला मिळाले. तारकर्लीजवळच्या या ठिकाणाबद्द्ल ऐकलच होतं. त्यामुळे देवबागलाच जायचं ठरलं. गजालीच्या धाग्यावर माहिती मागितल्यावर विवेक देसाई आणि यो-रॉक्स आणि मस्त माहिती आणि संपर्क दिले. जानेवारी च्या पहिल्याच विकांताला दौरा करायचा ठरलं.

राहायची व्यवस्था 'हेरंब निवास' मध्ये झाली. सौरभने संपर्क क्रमांक दिलेलाच होता, केळुस्करांनीपण एक खोली ठेवून दिली. पुण्याहून मालवणला आणि परतीसाठी एकच बस कळाली, महामंडळाची निमआराम. ही बस निगडीहून संध्याकाळी ७ ला निघते आणि चिंचवड-पुणे स्टेशन-स्वारगेट-कोल्हापूर्-कणकवली करत पहाटे ६ दरम्यान मालवनला पोहोचते. मालवणहून संध्याकाळी ४:१५ वाजता निघून याच मार्गाने पहाटे साधारण २-३ दरम्यान निगडीला पोहोचते.

मालवणला पहाटे स्टँडवर चहा घेवून देवबागच्या बससाठी वाट पाहत बसलो. मालवण-देवबाग (साधारण ११-१२ कि.मी.) दर अर्ध्या तासाने बसेस आहेत, तारकर्ली मार्गे जातात. कोकणाच्या एवढ्याश्या रस्त्यावरून पहाटे बस सुसाट धावत होती, आम्ही काळजीतकी कोण कुठून आडवं येतयं आणि धडकतयं, याच नादात आम्ही थेट देवबाग गावात पोचलो. पण आम्हाला मध्येच उतरायचं होतं (न्यू इंग्लिश शाळेजवळ), त्यामुळे त्याच बसने परत जाऊन तिथे उतरलो. कदाचित आम्ही एव्हढ्या लवकर येण्याची अपेक्षा नसल्याने रिसॉर्टला कुणीच नव्हतं, पण पाच-एक मिनिटातच केळुस्कर आले आणि आम्हाला 'सी-फेसिंग' खोली दिली. आवरून झाल्यावर नाष्टा केला, किनार्‍यावरच घर असल्यामुळे मस्त पैकी खुर्च्या टाकून समुद्राकडे पाहत चहा-पोह्याचा नाष्टा केला, मग बीचवर भटकून आलो.

रुमचे काही प्रचि

प्रचि १

प्रचि २

प्रचि ३

प्रचि ४

देवबाग बीचचे काही प्रचि,

प्रचि ५

प्रचि ६

प्रचि ७

प्रचि ८

प्रचि ९

प्रचि १०

प्रचि ११

प्रचि १२

प्रचि १३

नंतर स्कुबा-डायविंग साठी मालवणला जायचं होतं पण आमच्याकडे स्वतःचे वाहन नसल्याने एकतर बस नाहीतर जीपने जावं लागणार होतं, पण स्कुबा डायविंगवाले आणि केळुस्करांची ओळख होती की काय माहित, पण त्यांचा एक माणूस आला आणि मी, माझा मित्र आणि तो असे ट्रीपल सीट मालवणला गेलो.
त्याने कुठल्या बोळा-बोळातून गाडी घातली तोच जाणे. शेवटी ठरलेल्या ठिकाणी आलो. स्कुबा डायविंग सिंधुदुर्ग किल्याच्या पायथ्याशीच होतं, तिथपर्यंत जाण्यास आणि येण्यास बोटची व्यवस्था हेच लोक करतात. त्यांचे प्रशिक्षित मार्गदर्शक एकावेळी चार लोक पाण्याखाली नेतात आणि २०-२५ मिनिटे पाण्याखाली सैर करवून आणतात.जवळपास १८-२० फूट पाण्याखाली नेलं जातं. अतिशय रोमांचकारी अनुभव होता तो, मी पहिल्यांदाच पाण्याखाली गेलो होतो, आणि चष्मा घालू देत नाहीत त्यामुळे दिसेल का नाही या विवंचनेत होतो.

पहिल्यांदा आपल्याला स्कुबासाठी आवश्यक मास्क घालतात यामुळे नाक पूर्ण बंद होतं, श्वासोच्छवास तोंडाने करावा लागतो, त्या मास्कलाच एक पाइप असतो, तो व्यवस्थित घालायचा, बोटीमधून खाली पाण्यात उतरायचं आणि प्रशिक्षक आपल्याला २-३ मिनिटे पाण्याखाली डोकं घालून तोंडाने श्वासोच्छवास करण्याचा सराव करवून घेतात. एकदा का तुम्ही तयार झाला की मग काय अप्रतिम समुद्र विश्वाची एक झलक अनुभवण्यास आपण निघतो. इतके दिवस केवळ टिव्ही आणि चित्रपटात पाहिलेल्या या विश्वात आल्यावर अक्षरशः भान हरपतं, जवळून जाणारे सुंदर रंग बिरंगी मासे, प्रवाळ खडक, भन्नाट समद्र वनस्पती... अवर्णनीयच. ही सफर केव्हा संपली हेच कळालं नाही. वर बोटीवर आल्यावर १० मिनिटं 'ZNMD' मधल्या ह्रितिक सारखं बसून अनुभव मुरवला:-D. त्यातच एका छोट्या बोटीतून तरंगती टपरीवाला होता, त्याच्या गरमागरम कॉफी आणि चविष्ट उपम्याने कळस केला.

स्कुबाचे काही प्रचि (त्यांनी काढलेले)

प्रचि १४

प्रचि १५

प्रचि १६

एकूण खर्च १५००/- प्रत्येकी आहे, यात बोटीने ये-जा, डायविंग आणि आपले स्कुबा करतानाचे फोटो विथ सीडी आहे. त्यानंतर जर इच्छा असेल तर सिंधुदुर्ग किल्ला पाहायला जाऊ शकता. आम्ही परत मालवणला आलो. आंघोळी आवरुन जेवायला बसलो, मस्त शाकाहारी जेवणाने तृप्त होऊन जरा डुलकी घेतली. संध्याकाळी देवबागच्या सुनामी आयलंडला निघालो. इथे खास वॉटर स्पोर्ट होतात. जेटस्की, वॉटर स्कूटर, बंपी राइड, बनाना आणि डॉल्फिन राइड व कायाकिंग उपलब्ध आहेत. थोडेफार कस्टमाइज करता येतात. आम्ही जेटस्की, बंपर राइड आणि बनाना राइड केली. इथे पण बोटीने ये-जा आणि हे तीन खेळा मिळून प्रत्येकी ७००/- खर्च आला. फुकट चहा पण मिळाला

त्सुनामी आयलंडचे काही प्रचि

प्रचि १७

प्रचि १८

प्रचि १९

संध्याकाळपासून बीचवर खुर्च्या टाकून मस्त गप्पा मारत बसलो. अधूनमधून केळुस्कर चौकशी करत होते त्यात आणखी काही लोक आले होते राहण्यास तिथे. तेव्हढ्यात आमच्या गरमागरम भजींची ऑर्डर आली, गरमागरम भजी, चहा आणी समुद्री वारे.. अहाहाहा 'काय सांगू महाराजा' असं वाटत होतं.

दुसर्‍या दिवशी खास घावन-चटणीचा गरगरीत नाष्टा करून रुम सोडली आणि परत मालवणास आलो. तिथून विवेक यांनी सुचवलेल्या धामापूर गावी निघालो. कुडाळला जाणारी एक यष्टी धामापूर मार्गे जाते. मंदिर साधं पण शांत आहे. मंदिराला लागून असलेला विस्तिर्ण जलाशय फार सुंदर आहे. जलाशयावरून वाहणारा वारा, मंदिराची शांतता अगदी अनुभवण्यासारखी आहे. तिथे बोट राइडपण उपलब्ध आहे. संपूर्ण दुपार तिथे बसून होतो, निघूच नये असं वाटत होतं.

श्री भगवती देवी मंदिर धामापूर,

प्रचि २०

प्रचि २१

प्रचि २२

प्रचि २३

प्रचि २४

प्रचि २५

प्रचि २६

प्रचि २७

प्रचि २८

परत मालवणला आलो आणि 'अथिती बांबू' मध्ये जेवण केलं. नक्कीच रुचकर जेवण मिळतं पण वेटिंग फार असतं, आम्ही दोघच असल्याने आम्हाला लगेच जागा मिळाली. जेऊन मालवण स्टँडला चालतच निघालो, वाटेत बाजारात थोडी खरेदी केली आणि परतीच्या प्रवासाला निघालो. वाटेत करुळ घाटात रात्रीच सुंदर तारकायुक्त आकाशाने या झक्कास प्रवासाची सांगता झाली.

त.टी.

१) स्कुबा डायविंग करताना पाण्याखाली गेल्यावर कानाला दडे बसतात, अशावेळी न घाबरता, तोंडाने श्वास घायचा आणि सोडताना नाक्-तोंड बंद करून सोडायचा, जो कानावाटे बाहेर पडतो आणि कान मोकळे होतात.
२) स्कुबाला वेगळा सूट नसतो, स्त्रियांसाठी मिळतो आणि बोटीवरच छोटीसी चेंजिंग रुम असते.
३) पाण्याखाली त्यांचाच माणूस आपले फोटो काढतो आणि संध्याकाळ पर्यंत सीडी आणून देतो.
४) वॉटर स्पोर्ट्स मध्ये जेटस्की फार धोकादायक आहे, जवळपास १५०-२०० कि.मी. ने ती स्की फिरवली जाते, जर पकड निसटली तर पाण्यात आदळणारच. लाइफ जॅकेट असतच, पण मार लागणाराअच (मला मिळाला नाही )

प्र.चि. २९

धन्यवाद!