ज्ञानोबा माऊली

Submitted by पुरंदरे शशांक on 9 December, 2012 - 22:19

ज्ञानोबा माऊली.

अगा जी उदारा | ज्ञानाच्या सागरा | संत योगेश्वरा | तुज नमो ||

विश्वाची माऊली | भक्तांसी साउली | तुझीच पाऊली | हृदी वसो ||
(प्रगटे करुणा | ऐसा गा महिमा | परब्रह्मरुपा | तुज नमो ||)

ग्रंथ ज्ञानेश्वरी | काय वानू थोरी | बरवी साजिरी | दिली आम्हा ||

तूच उकलवी | त्यातील भावासी | कवळ भरवी | माता जैशी ||

लागोनी चरणा | प्रार्थी पुन्हा पुन्हा | द्यावे कृपादाना | इतुकेच ||

नको योगज्ञान | निरंजनस्थान | भक्तिचे निधान | देई माये ||

वैखरी वसावी | ओवी ज्ञानदेवी | हरिपाठी गोडी | वाढो नित्य ||

गुरुकृपे साच | कळो आले हेच | ठसा भक्तिचाच | श्रेष्ठ ऐसा ||

तोच अंतरात | उमटवी सत्य | जाईल असत्य | लयासीच ||

जपता अंतरी | ज्ञानदेव हरि | दुर्गुण विखारी | उरेचिना ||

व्यापता निखळ | तूच गा निर्मळ | भरे प्रेमजळ | हृदयात ||

मग मी निवांत | राहेन निश्चिंत | येवो की देहांत | बापुडा तो ||

विश्वाची माऊली | राखे ब्रीदावळी | पुरवावी आळी | बालकाची ||

शब्दखुणा: 
Group content visibility: 
Public - accessible to all site users

तोच अंतरात | उमटवी सत्य | जाईल असत्य | लयासीच ||

जपता अंतरी | ज्ञानदेव हरि | दुर्गुण विखारी | उरेचिना ||

व्यापता निखळ | तूच गा निर्मळ | भरे प्रेमजळ | हृदयात ||

सुंदर..!! शशांक....

शशांकजी, केवढा अवघड विषय लीलया हाताळलात.
शब्दकळा अशी की सात्विकाला सौंदर्याचा साज..

व्यापता निखळ | तूच गा निर्मळ | भरे प्रेमजळ | हृदयात ||
मग मी निवांत | राहेन निश्चिंत | येवो की देहांत | बापुडा तो ||

अन त्यावर शांतरसाचा शिडकावा...

छान Happy

शशांक अतिशय अतिशय रसाळ... खूप आवडली.
नको योगज्ञान | निरंजनस्थान | भक्तिचे निधान | देई माये ||

मग मी निवांत | राहेन निश्चिंत | येवो की देहांत | बापुडा तो ||

... देहांताला बापुडा करण्याची शक्ती...
केवळ अप्रतिम

बागेश्री, जिप्सी, वैभव, स्मितू. कविन, मराठे, दिनेशदा, भारतीताई, डॅफोडिल्स, अवल, दाद ----------

प्रतिसादाबद्दल (म्हणजेच माऊलींवरील प्रेमाबद्दल) सर्वांचे मनापासून आभार.

"ओवी ज्ञानेशाची | अति आवडीची | पूर्ण ज्ञानेश्वरी | सामावली ||"

ग्रंथ ज्ञानेश्वरी | काय वानू थोरी | बरवी साजिरी | दिली आम्हा ||

तूच उकलवी | त्यातील भावासी | कवळ भरवी | माता जैशी ||

अप्रतिम.. Happy

प्रिय शशांक,

फार छान. तुमच्या रचनेत काव्यगुण आणि भक्तीभाव दोन्ही आहेत. तुम्ही अधिकाधिक लिहावे असे वाटते.
एक छोटीशी सूचना - तुमच्या लिखाणात काहीच दोष नाहीत म्हणून (आधीच क्षमा मागतो Happy )

ह्या प्रकारच्या काव्यात, दुसरया आणि तिसरया चरणाचे यमक जुळले पाहिजे. पाहिल्याचे जुळले तर उत्तम, नाही जुळले तरी ठीक.
उदा (दोन्ही प्रकारचे):
१. देवाचिये द्वारी उभा क्षणभरी तेणे मुक्ती चारी साधियेल्या || - (३ जुळतात)
२. तुका म्हणे तेथे पाहिजे जातीचे येरा गबाळ्याचे काम नोहे || - ( २ जुळतात)
३. प्रगटे करुणा ऐसा गा महिमा परब्रह्मरुपा तुज नमो || - (काहीच जुळत नाही)

मी ह्यातील तज्ञ नाही - अभ्यासू आहे.

मनस्मी, विक्रांत, अनिल, शाम, चैतन्य, सारीका, आकाश नील, पा भे, के अंजली - सर्वांना मनापासून धन्यवाद.

आकाश नील - तुमचे म्हणणे पूर्ण मान्य. आता केलेला बदल कसा वाटतोय?

सुरेख!

श्री ज्ञानेश्वर महाराज जन्मसोहळा - श्रावण वद्य अष्टमी

श्री ज्ञानेशो भगवान विष्णु: ||

माऊली, माऊली ......