टाकले पाऊल पहिले...!!!

टाकले पाऊल पहिले, थांबणे आता कुठे !
शब्द माझे गीत व्हावे सहज गुणगुणता कुठे !

आरसा हसतो मला अन् प्रश्न एकच टाकतो
दावितो जैसे जगा तैसे तुम्हि असता कुठे !

काम त्याचे तेच आहे, तेच तो करणार आहे
दोष का काट्यास द्यावा तो असा रुतता कुठे !

जन्म घेतो, श्वास घेतो, वयपरत्वे वाढतो
पांढरे होतात केसहि, खाउनी खस्ता कुठे !

रंग माझा, पाट माझा, चित्रकारही मीच व्हावे
आणि अलगद तुज टिपावे तु अशी दिसता कुठे !

लपविण्या मी दुखः माझे मार्ग सोपा काढला
हासले खोटेच तेहि, मी असे हसता कुठे !

फासुनी शेंदूर कोणा येतसे दैवत्व का?
झुकविता डोके समोरी दगड तो नुसता कुठे !

मैफली माझ्या सुखांच्या रंगल्या या जीवनी
अंतरीच्या वेदनेचा सूर मज गवसता कुठे !

काय तु आलास घेउन काय तु नेणार 'केतन'
दशदिशांना तळपुनी जाशील तु अस्ता कुठे !

- केतन पटवर्धन