तूरीच्या ओल्या दाण्यांची कचोरी चाट..

काही वर्षांपुर्वी माझ्या लहानपणी बर्‍याच भाज्या,फळभाज्या ,फळे हंगामी स्वरुपात च मिळायची.त्यामुळॅ त्यांचे महत्व भरपूर असायचे..त्या वस्तू आवर्जुन विविध रुपात वापरल्या जायच्या..त्यातल्या त्यात थंडी-पावसाळा रेलचेल असायची.तेव्हा हिरवे मटर्,हरभरे,ओल्या भुईमुगाच्या शेंगा,तूरीचे ओले दाणे,वाल्-घेवडा-सुरती पापडीचे दाणे-हिरवा लसूण ,हिरवी कांदे पात्,हिरवे कच्चे टोमॅटो ,करवंदे अशा कितीतरी वस्तु..आई त्यापासुन गरम सामोसे,मोठ्या करंज्या करायची..संध्याकाळच्या जेवणाचा हा च मेनू असायचा.दगडी कोळशाच्या शेगडीवर ,लोखंडी कढईत मस्त खरपूस तळलेले पदार्थ आम्ही सगळे फस्त करत होतो..त्याबरोबर हिरवी चटणी,लिंबाचे वा कैरीचे लोणचे असायचे.ती तृप्तीची चव अजुनही रेंगाळते आहे.मी ते सर्व पदार्थ करते पण "अगदी तश्शी "आई ची चव काही येत नाही.
हिरव्या तूरीच्या दाण्याच्या कचोर्‍या थोड्या वेगळ्या पद्धतीने केल्या आहेत.

मावे बाऊल मधे तूरीचे दाणे व त्यात अर्धी वाटी पाणी घालुन झाकुन मावेत २ मिनिटे फुल पॉवर वर शिजवुन घ्यावे.
हे दाणे त्यातील उरलेल्या पाण्यासकट मिक्सर मधुन एकदा भरडुन घ्यावे.
आले,लसुण्,हिरवी मिरची वाटुन घ्यावी.
पॅन मधे तेलाची फोडणी करुन त्यात हिंग-मोहोरी-जिरे घालावे.
बडीशोप,ओवा,तीळ,वाटलेला मसाला,हळद घालावे. त्यावर तूरीच्या डाळीचे भरडलेले मिश्रण घालुन तिखट-मीठ-गरम मसाला-लिंबू रस -कोथिंबीर व खोबरे घालुन मिश्रण छान ढवळुन घ्यावे.पॅन वर झाकण ठेवुन एक वाफ आली कि मिश्रण थंड करण्यासाठी ठेवावे.त्याआधी त्यात काजुतुकडे घालावे.
आता कणिक मीठ व तेल घालुन घट्ट भिजवुन ,मळुन घ्यावी.
या गोळ्याच्या लहान ल्हान पुर्‍या लाटाव्या..पुरीत एक एक चमचा सारण भरुन ,कचोरीचा आकार द्यावा.
कढईत तेल गरम करावे .गॅस कमी करुन या तेलात कचोर्‍या मंद आचेवर दोन्हीकडुन तळाव्यात..कणकेची पारी असल्याने लगेच तळली जाते.
अशा रीतीने सगळ्या कचोर्‍या तळुन घ्याव्या.
प्लेट मधे कचोरी त्यावर हिरवी चटणी,चिंचेची आंबट-गोड चटणी [सौंठ की चटनी],थोडी शेव घालुन खायला द्यावी,