सुगीची

व-हाड पावसाचे आले द-याखो-यात
सुखावले भातखाचर न्हाले जलधारात
कोण आचारी खपतो लाल महालात
अशी लगबग चालली रानी लग्नात

आली सुगीची वरात हिरव्या डोंगराला
नाचतात बेभान सानथोर नदीनाले
गावोगावचे सोयरे आलेले लग्नाला
बुट्टी हिरवी साजिरी, लाल मांडवाला

ताल धरीते इरले टपटप थेंबांच्या सुरात
लाल हळद सर्वांगा, भारी हुरूप मनात
गाणं भाकरीचं आलं श्रमिकांच्या ओठात
आयाबाया,बापू,नाना व-हाडाच्या स्वागता