मुक्तछंदातील कवितेची गझल करते
Submitted by बेफ़िकीर on 11 June, 2026 - 04:13
मुक्तछंदातील कवितेची गझल करते
एक वाऱ्याची झुळुक मोठा बदल करते
ग्रंथ, बाडे वाचणाऱ्यांना कुणी सांगा
एक साधी ओळसुद्धा मन तरल करते
मंदसे हासून झोपी जायची पूर्वी
आज ती खिडकी मला का बेदखल करते!
मी तिच्या सहलीत कायम अडथळा ठरतो
रुक्ष माझ्या जीवनाची जी सहल करते
वाकडे आहे नभाचे काय डोळ्यांशी
भूमिकांची नेहमी अदलाबदल करते
कोण जाणे स्कीम प्रत्येकास का रुचते
गुंतवा दुःखे नि जीवन ती डबल करते
जेवढी करशील चिंता तेवढी वाढे
'बेफिकिर' असणेच हे जगणे सफल करते
=====
-'बेफिकीर'!
विषय:
शब्दखुणा:
