जगणं.. ज्याचं त्याचं..

जगणं.. ज्याचं त्याचं..

नेहमीसारखी खाजगी शिकवणी आटोपून ती बसस्टॉप कडे वळली. अजून तीन महीने बाकी होते, ह्या वर्षाची शिकवणी संपायला. मग ह्या मुलांच्या परीक्षा! नंतर मग त्यांच्या उन्हाळ्याच्या सुट्ट्या सुरू होतील. शिकवणीतून मिळणारी कमाई थांबेल, मग दोन/तीन महीने.
तशी तिच्या कमाईची घरी खूप गरज होती असंही नाही. पण तिनेच ठरवलं होतं, ‘माझ्या शिक्षणाचा, कॉलेजचा खर्च मी करणार’. तेवढेच चार पैसे मिळत होते, अन् त्या पैशांवर मग तिला तिचे इतर छंदही जोपासता येत होते, घरून पैसे नं मागता. कॉलेजची सकाळची वेळ सांभाळून दुपारची ही दोन तासांची शिकवणी सहज जमत होती तिला.