रसमलाई प्रकरण

“घरची प्रकरणं बाहेर मांडायची नाहीत” असं आई नेहमीच सांगायची..पण नियम मोडायची सवयच असल्यामुळे हा पोस्ट लिहायचा मोह काही आवरला नाही. असो...महिन्यातून एकदा तरी माझ्या घरी रसमलाई बनतेच बनते. पण रसमलाईचा हा प्रवास तितका सोप्पा नक्कीच नव्हता.

लग्नानंतर सासरची मंडळी खाण्याचे शौक़ीन आणि सासुबाई उत्कृष्ट cook त्यामुळे खवाय्येगीरी शिकण्या पालिकडे काही पर्यायच नव्हता. माझं सासर वडाळ्याचं..तिथला “ब्रिज अलबेला” मिठाईवाला अगदी फ़ेमस आणि आमच्यासाठी जणु देवच. त्याची गाथा गाताना नवरोबा कधीच थकत नसत. त्यात रसमलाई आणि रसगुल्ला हया विषयावर भरभरून बोलत असत. तेव्हाच ठरवलं, लवकरच रसमलाईचा फडशा पाडायचा.