मराठी भाषा दिवस २०२०

मराठी साहित्यात डॉ. अनिल अवचट यांच्या लेखनाला एक वेगळं आणि महत्त्वाचं स्थान आहे. सुरुवातीपासूनच त्यांनी स्वत:ला विविध सामाजिक कार्यांमध्ये झोकून दिलं आणि हे कार्य करत असताना आलेले अनुभव ते सातत्याने शब्दबद्ध करत राहिले. प्रांजळपणा, तळमळ, सतत नवनवीन लेखनविषयांचा शोध घेण्याचा आणि त्या विषयांच्या मुळाशी जाण्याचा त्यांचा उत्साह, क्लिष्ट विषयावर लिहितानाही त्यात आणलेली रोचकता अशी त्यांच्या लेखनाची अनेक वैशिष्ट्ये सांगता येतील. त्यांनी लिहिलेल्या पुस्तकांच्या नावांच्या यादीकडे नजर टाकली तरी त्यातलं वैविध्य डोळ्यात भरेल.

रोजच्या कामांच्या रहाटगाडग्यातून थोडासा विरंगुळा मिळवून देतो, तो छंद. ज्यातून मिळणार्‍या निखळ आनंदासमोर त्यासाठी घेतलेले कष्ट क्षुल्लक वाटतात, तो छंद! असा छंद जोपासताना आपला वेळ तर आनंदात जातोच, शिवाय आपल्या ज्ञानात, कौशल्यात भर पडत जाते. आपल्यासारख्याच इतर छांदिष्टांशी ओळखी होतात, मैत्र जुळतं, एकूणच या सगळ्यातून आपलं व्यक्तिमत्त्व समृद्ध होत जातं.

आपल्यापैकी खूप जणांना असा एखादा तरी छंद नक्कीच असतो. कुणी सुट्टी मिळताच डोंगर-किल्ले चढायला जातात, तर कुणी तासन्तास नेटाने बसून विणकाम, भरतकाम करतात. कुणाला नाणी जमवायला आवडतं, तर कुणाला परसबाग फुलवायला!