गगनामधले तारे

गजल

Submitted by रज्जाक शेख on 20 March, 2018 - 09:10

एकाकीपण संपवण्या सरसावून आली गजल
सारे सोडून गेले तेव्हा धावून आली गजल

चालेनाशी झाली जेव्हा मेंदूचीही मात्रा
रक्तात चिंब हृदयाच्या न्हाऊन आली गजल

अस्पष्ट भावनांना आकार द्यावयासाठी
संकेत सारे बंधनांचे धुडकावून आली गजल

निराशेच्या भयाण काळ्या रातीने केले हैराण
दीप आशेचे सर्वत्र तेव्हा लावून आली गजल

पराजयाने पुरता जेव्हा खचून गेलो होतो
ध्वज तेव्हा विजयाचा उंचावून आली गजल

अव्हेरले जगाने साऱ्या, वा-यानेही पाठ फिरवली
मज कवेत घेण्या बाहू फैलावून आली गजल

डॉ. रज्जाक शेख ‘राही’

शब्दखुणा: 

का करती हेवा?

Submitted by रज्जाक शेख on 20 March, 2018 - 08:58

का करती हेवा, का लोक जळाया लागले
प्रश्न हे दिनरात, मनाला छळाया लागले

संपले बहुतेक त्यांचे खाजगी उद्योग सारे
लोक माझे का बरे दळण दळाया लागले?

आले बघा हे घर माझे हाकेच्या अंतरावरी
नेमके आताच का, अवसान गळाया लागले?

माझ्यासोबत राहूनी, गेले तेही वैतागुनी
दुःख मजला सोडूनी, सारे पळाया लागले

वेळ झाली 'राही' जगाला सोडून जाण्याची
अन आताशी कुठे मजला,थोडे कळाया लागले

डॉ. रज्जाक शेख ‘राही’

प्रांत/गाव: 
शब्दखुणा: 
Subscribe to RSS - गगनामधले तारे