लेकरू

'शहाणं ग लेकरू , माझं वेल्हाळ पाखरूं'
असं म्हणणारी आजी आता राहीली नाही
आणि ते शब्द सुध्दा परत काही कानावर
पडले नाही....

आईची नोकरी आणि बाबांची फिरती
कौतुकाच्या बोलांना कशी येणार भरती ?
आजीच असायची घरी , मला धरायची उरी
आणि म्हणायची ... 'शहाणं ग लेकरू , माझं वेल्हाळ पाखरूं'

खुप करायची लाड , खाऊचं द्यायची घबाड
किताही घाला दंगा , तिचा माझ्या भोवतीच पिंगा
माझ्या सगळ्या चुका माफ , वरती कौतुकाची थाप ...
काय तर 'शहाणं ग लेकरू , माझं वेल्हाळ पाखरूं'