ती गझल- 06 जुलै 2017
Submitted by बेफ़िकीर on 27 July, 2017 - 23:45
जी मनावरती नशा बनुनी पसरते ती गझल
जी कवीपासून मदिरा दूर करते ती गझल
भांडणे होतात माझी सारखी माझ्यासवे
जी स्वतःबद्दल स्वतःचे कान भरते ती गझल
जो तिला प्रत्येकवेळी साथ देतो तो कवी
ऐनवेळी जी कवीलाही विसरते ती गझल
दाद वरवरचीच घेतो आत्मप्रौढीने कुणी
जी मुळापासून हृदयाला उकरते ती गझल
फेकली जाते प्रवाहातून जेव्हा सारखी
भोवरा शोधून त्यामध्ये उतरते ती गझल
प्रियकराच्या वेदनांना मानते प्रसुतीकळा
प्रेयसीच्या बेवफाईने बहरते ती गझल
कडकडाटाची अपेक्षा ठेवती सारे.... तिथे
एक टाळी वाजल्यावर जी बिथरते ती गझल
विषय:
शब्दखुणा: