सामोरी
Submitted by भारती.. on 6 April, 2015 - 07:19
सामोरी
नको वायदा नको उधारी नको भीक अन नकोच चोरी
हर्ष हवा उन्मुक्त नको तो खुंटा त्याची दावणदोरी
उधळत जाते आकाशाच्या कडेकडेने दूरदूरवर
येऊ नका मागावर आता सांभाळा तुमची चाकोरी
झाली म्हणून केली फसगत, केली म्हणून झाली नाही
नाही कळले ? कशी कळावी ही जन्माची दिवाळखोरी
वाटेमध्ये कुठे कधीसा सूर बावरा जुळला होता
वाऱ्याने वाऱ्यावर लिहिणे शिलालेख का ठरते पोरी
वैशाखाच्या ऐन दुपारी मधूर कूजन करतो कोकिळ
अशी नेहमी दाहावरती होते मोहाची शिरजोरी
विषय:
शब्दखुणा: