तू एक कलती दुपार किंवा कलती संध्याकाळ

काही गोष्टींवर, मित्रांनो, कविता नाही लिहावीशी वाटत. असे वाटते की अगदी अक्षर अक्षर लिहावे. समोरच्याला अगदी अक्षर अक्षर वाचता यावे. अगदी कीस पाडता यावा. अगदी वधू व्हावे शब्दांनी आणि वर व्हावे वाचकांनी! प्रत्येकवेळी कविता नाही लिहिता येत!

माझेच कॉलेज! मीच होतो तेथे तीन वर्षे! पदविका घेतली. मग पदवी घ्यायला इतरत्र गेलो. पण ती तीन वर्षे? ती तीन वर्षे ती तीन वर्षे होती जेव्हा एक शाळेतून बाहेर पडलेला अजाण बालक कॉलेजच्या एका अनिर्बंध वातावरणात स्वतःचे संस्कार, मूल्ये आणि भय घेऊन आला होता.