पुरे जाहला हा खटाटोप आता.
Submitted by बेफ़िकीर on 17 November, 2011 - 06:18
===============================
हा दोष नगण्यत्वाचा कोणाच्या माथी मारू
अस्तित्व टिकवण्यासाठी हे लिहितो मी बाजारू
===============================
पुरे जाहला हा खटाटोप आता
पहा झोपले जग जरा झोप आता
उभा जन्म हा एक मिसरा असावा
करावा प्रभावी समारोप आता
स्वतःऐवजी पाहतो हा जगाचे
असा एक व्हावाच आरोप आता
फुका सावलीच्या अपेक्षेत होतो
कधी व्हायचे झाड हे रोप आता
मिळालास माझ्या प्रयत्नांमुळे तू
नशीबा न व्हावा तुझा कोप आता
-'बेफिकीर'!
===============================
गुलमोहर:
शब्दखुणा:
शेअर करा
