खेळण्याचे दिवस

खेळण्याचे दिवस
दोन भावांबरोबर वाढल्यामुळे की काय माझ्यात टिपिकल "बायकी" समजले जाणारे गुणधर्म निदान त्या काळात तरी खूपच कमी असावेत. कारण "जरा तरी मुलीसारखं वागत जावं गं!" अश्या कळकळीच्या विनंत्या घरातल्या मोठ्या बायका.........म्हणजे आई, मावश्या, काक्या, माम्या, आत्या यांच्याकडून मिळायच्या.
लहानपणापासून हुंदडण्यात खूपच रस! हुंदडण्याची अगदी जुनी आठवण म्हणजे आमच्या जुन्या घरातली. चुलत भावंडांबरोबर लंगडी खेळतानाची. तेव्हा केवढं तरी मोठं अंगण वाटायचं ते! आणि मोठ्या चुलत बहिणीला आऊट करायची पाळी आली की अगदी आव्हानच वाटायचं ते!