होत्याचा नव्हता झालो

फिरलेत मनाचे वासे... होत्याचा नव्हता झालो
मी केले प्रेम जरासे... होत्याचा नव्हता झालो

जे माझे होते त्यांनी... तेथे पोचवले जेथे
नव्हत्यांनी दिले दिलासे... होत्याचा नव्हता झालो

गेलीस विसरुनी पुरती... तू देवघेव श्वासांची
मी विरलो देत उसासे... होत्याचा नव्हता झालो

होतो तेथे का नव्हतो... नव्हतो तेथे का होतो
देऊन स्वतःस खुलासे... होत्याचा नव्हता झालो

नव्हत्याचे होता यावे... हे दान पाहिजे होते
पण पडले उलटे फासे... होत्याचा नव्हता झालो

क्षण अन् क्षण मोजत मोजत... काही दशकांनी मेलो
मी इतक्या महत्प्रयासे... होत्याचा नव्हता झालो

मी रडतो कारण की मी... नव्हतो तो झालो आहे