मे महिना

तुळशीमागला औदुंबर,
ते कौलारु मायेचं घर

कवठीचाफा.. सोनचाफा..
कर्दळ नी पिवळा चाफा
गावठी गुलाब.. लाल जास्वंद
टप्पोरं जांभूळ, चिकाची करवंदं

ते कोप-यातलं रायआवळ्याचं झाड
लाड करणारे ते हिरवे हिरवे माड

विहिरीत सोडलेला पोहरा
किंचित कुरकुरणारा रहाट
प्राजक्ताच्या सड्यांनी
तेव्हा उगवायची ती पहाट

पिकलेला आंबा,
झाडावरुन अवचित पडलेला..
रसाळ फणस,
आजोबांनी समोर बसून फोडलेला

आंब्याच्या रसाचे
कपड्यावर डाग पिवळे
गोड गोड पाण्याचे
शुभ्र मलईदार शहाळे

चूलीकडली धग, शेणाचं सारवण
वर्षाच्या बेगमीचं लाकडाचं सरपण
आजीच्या हातचं माश्याचं कालवण
रसातले शिरवाळे, आंबोळ्या नी घावण