थरांचे राजकारण सोसवेना

थरांचे राजकारण सोसवेना
मला माझेच मिश्रण सोसवेना

तिची जागेपणी पडतात स्वप्ने
जिला स्वप्नात जाग्रण सोसवेना

कधी होईल प्रत्यक्षात व्याधी
असे हे रोज लक्षण सोसवेना

स्वतःचाही जरा होईन म्हणतो
मला नुसते तुझेपण सोसवेना

तुझे सोडून जाणे सोसले पण
तुझे कुठलेच कारण सोसवेना

विचारावे कुणाला हे कळेना
कुणावाचून हा क्षण सोसवेना

पुन्हा मद्यात हा मेंदू धुवावा
विचारांचे प्रदूषण सोसवेना

सरींचा अर्ज दे ग्रीष्मास माझ्या
तुला कंगाल श्रावण सोसवेना

प्रयत्नांची पराकाष्ठा करुनही
मला हे नांव भूषण सोसवेना