पाककृती स्पर्धा क्रमांक ३ : पेय - फळ + फूल + मसाला : चवींचा त्रिवेणी संगम - रंगमोहिनी, फ्रुट ऑम्ब्रे - अनामिका.

संयोजकांनी अतिशय कल्पक अशा पाककृती स्पर्धांचे आयोजन करून चांगलीच धमाल आलीये यावेळी.
तर ह्या तिसऱ्या स्पर्धेत अगदी शेवटच्या क्षणी हि प्रवेशिका.

आपल्या देशात इतकी विविध प्रकारची फुले आणि फळे उपलब्ध आहेत कि असंख्य मॉकटेल्स ह्यातून तयार होऊ शकतात असे ह्या स्पर्धेच्या निमित्ताने विचार करतांना लक्षात आले. तर झालं असं आवडत्या गुलाबापासून एखादे पेय करावे असे डोक्यात होते पण त्यासाठी गावठी गुलाब हवा आणि तो काही फुललाच नाही. अध्ये मध्ये तीन-चार फुले आली पण बाप्पाचा मान मोठा म्हणून बाप्पाच्या चरणी अर्पण करण्यात आली. हि स्पर्धा सुरु झाल्यावर एके रात्री आईच्या घरी असतांना बहरलेला पारिजातक पाहिला आणि ठरवले कि ह्यापासूनच काहीतरी करावे.

मला अनेकविध रंग असलेले नेत्रसुखद पेय करायचे होते आणि म्हणून एकापेक्षा अधिक फुलांचा वापर करायचे ठरवले. इथे अर्थात आई बाबांच्या मदतीशिवाय काही होणार नव्हते कारण फुलांची जमवाजमव तेच करणार होते. म्हणून ह्या स्पर्धेच्या निमित्ताने शोध लावलेली हि रेसिपी माझ्या आई बाबांना समर्पित.

साहित्य -
फळे -
१. डाळिंब
२. पेअर
फुले -
१. निळा गोकर्ण
२. पारिजातक
मसाले -
१. वेलची पावडर
२. बडीशेप

इतर - साखर आणि सजावटीसाठी फुले.

कृती -
पूर्वतयारी -
१. गोकर्णाच्या फुलांचा गडद रंगाचा चहा तयार करून घ्यावा. थोडा चहा थंड करायला ठेवून उरलेल्या चहाचा बर्फ करायला ठेवावा.
२. पारिजातकाची फुलं आइस ट्रे मध्ये घालून फुलांचा बर्फ करायला ठेवावा.

३. तसेच बडीशेपेचे पाण्यात उकळलेले सरबत हि बर्फ करावे.
४. साधारण ४ मोठे चमचे साखरेपासून पाक करून घ्यावा. ह्या पाकातच थोडी वेलची पूड घालावी आणि पारिजातकाची देठे घालावी. साधारण दोन मिनिटानंतर गॅस बंद करावा. अतिशय सुरेख केशरी रंगाचे सिरप तयार होते.
हे हि थंड करायला ठेवावे.

कृती -
५. आता पेअरचे तुकडे करून घट्ट ज्युस करावा.
६. थोडे डाळिंबाचे दाणे कुस्करून रस आणि दाणे एकत्रच असू द्यावे.

७. आता हे पेय असेम्बल करावे.
पारिजातक सिरप + पारिजातक आइस क्यूब - पेअर घट्ट ज्युस - क्रश केलेले डाळिंब + डाळिंब आइस क्यूब - बडीशेप आइस क्यूब - गोकर्ण आइस क्यूब + थंड गोकर्ण चहा

निवांत ह्या पेयाचा आस्वाद घ्यावा. (अर्थात इतरांनी, मला स्पर्धेची वेळ संपायच्या आत पाककृती पोस्टायची घाई)
हे पेय जितके सुंदर दिसते तितकेच चवीला सुरेख लागते.

त. टी.
१. आवडत असल्यास थोडे काळे मीठ घालू शकता. त्याने चव खुलते.
२. ह्यात प्लेन सोडा पण मस्त लागेल. अर्थात आवडत असेल तर घालावा.