पाककृती स्पर्धा क्र. 1: जिन्नस एक, पदार्थ अनेक - mi_anu - लालभडक टमाटे!

ही स्पर्धा जाहीर झाल्या झाल्या मी मनात 'डिब्स ऑन टोमॅटो' ओरडले.आमच्याकडे हमखास मिळणाऱ्या 3च गोष्टी: कांदा बटाटा टोमॅटो.
या सर्व रेसिपी करायला अप्पम पीठ भिजण्याचा वेळ सोडून 1. 5 तास लागला.अजून 2 करायचे मनात होते पण हे सर्व मावेल अशी सिरॅमिक डिश मी 3 महिन्यांपूर्वी फोडली.त्यामुळं आता नवी खरेदी नको वाटली.हा मागच्या वर्षी वरणभात चॅलेंज ला नवा घेतलेला ओणम प्लॅटर. याचा पहिला बड्डे झाला म्हणजे.
टोमॅटो म्हणावा तितका छान कलर देत नाहीये, फूड कलर वापरावा असे मोहाचे क्षण अनेक आले.पण त्यांच्यावर मात केली.मुंढे महाराज संस्कार.
या माझ्या पद्धतीने रेसिपी.

प्रयत्न1-टोमॅटो हलवा
1. यात एकच लक्षात ठेवायचे आहे की नीट शिजवून टोमॅटो च्या व्यक्तिमत्वाची गळचेपी केल्याशिवाय कोणीही त्याला गोड पदार्थ म्हणून स्वीकारणार नाही.
2. छोट्या कढईत अर्धा चमचा तूप टाकावे.यावर टोमॅटो ची मिक्सर मधून काढून बनवलेली प्युरी टाकून आणि साधारण 1 टोमॅटो ला 2 चमचे साखर या प्रमाणात साखर टाकून झाकण घालून नीट शिजवावे.
3. टोमॅटो चा टॉमेटीय वास जाऊन साखरेचा गोडसर वास यायला लागला की त्यात कंडेन्स मिल्क आणि तुकडा काजू आणि दुधात मिसळलेले केशर घालावे.
4. घट्ट झाले, वडी थापता येईल असे वाटले कि गॅस बंद करावा.
5. एका ताटात तुपाचा हात लावून चप्पट वडी थापावी.मी चॉकलेट चे गुलाब आकार साचे वापरून पाहिले.पण ते वडी साच्यातून काढल्यावर गुलाब दिसायला तयारच होईनात.कुकी कटर पण नव्हते.मग हातानेच बदाम आकार दिला.

प्रयत्न2-टोमॅटो झुणका(हा वाटीत आहे बदामाशेजारी)
1. टोमॅटो चिरून त्यात सुमारे एका टोमॅटो ला पाव चमचा या प्रमाणात मीठ घालून मिसळून झाकून ठेवावे.
2. सुमारे 2 तासांनी टोमॅटोला पाणी सुटले असेल.झुणका त्यातच बनवायचा.जास्त पाणी बाहेरून घातले की फाऊल धरले जाते.
3. खोल तव्यात 2 चमचे तेल घालून थोडे धुरावले की मोहरी जिरे हिंग घालून लगेच टोमॅटो आणि klm(कांदा लसूण मसाला.हा मस्ट. साधे तिखट आणि साधा गोडा मसाला घातल्यास फाऊल धरले जाते.
4. टोमॅटो मऊ शिजला की यात मावेल इतकेच बेसन(साधारण एका मिडीयम टोमॅटो ला 2 साधे खायचे चमचे शिग टाकून) घालून पटापट मिक्स करावे व एक मिनिट झाकण ठेवून लगेच भाकरी बरोबर खायला घ्यावे.गिल्ट नसल्यास वरून पाव चमचा तेल चालेल.

प्रयत्न3-घी टोमॅटो राईस
1. तांदूळ भिजवून निथळायला बाजूला ठेवावे.कोणतेही वापरू शकता.बासमती किंवा आंबेमोहोर असल्यास उत्तम.
2. आले लसूण कोथिंबीर मिक्सरमध्ये बारीक करून घ्यावे
3. भांडे गॅसवर गरम करून त्यात 2 मोठे चमचे तूप घालावे.तूप तापल्यावर हिंग जिरे.आणि लगेच आपण स्टेप 2 मध्ये बनवलेलं वाटण घालून चमच्याने हलवत राहावं.खमंग बटाटेवडे टाईप वास पसरेल.लोक नक्की काय बनतेय हे बघायला डोकावून जातील.
4. आता या मिश्रणात तुकडा काजू(स्वस्त पडतो आणि स्वतः कापावा लागत नाही) 2 चमचे घालून नीट परतावे.काजू वाटण टाकण्याच्या आधी टाकला तरी चालेल.पण करपू नये म्हणून नीट लक्ष ठेवा.
5. आता निथळलेला तांदूळ यात घालून खमंग परतावे.तांदूळ तेलकट सोनेरी चमकला पाहिजे.
6. आता यात भरपूर टोमॅटो प्युरी आणि मीठ घालून(1 छोटी वाटी तांदूळ असतील तर 5 मिडीयम टोमॅटो चालतील.) परत परतावे.
7. 3 मिनिट परतल्यावर यात पाणी घालून(टोटल लेयर च्या किमान 3 पेर वर आले पाहिजे पाणी.) नीट मिक्स करावे.
8. हवा असल्यास klm घालू शकता.किंवा आवडीचा कोणताही जास्त उग्र नसलेला गोडा मसाला.पंजाबी गरम मसाला जरा उग्र होतो.टोमॅटो चे कम्फर्ट फूड अस्तित्व झाकोळते.
9. साधारण 3 व्हॉटसप मेसेज लिहिल्यावर एकदा या रेट ने ढवळत राहावे.
10. भात शिजायला 25 मिनिटे लागतील.शिजला असं वाटलं की पटकन बंद करून ताटात वाढून अजून अर्धा चमचा तूप घ्यावे.बरोबर बटाटा साबुदाणा पापड असल्यास झकास.नसल्यास असुदे.

प्रयत्न4-टोमॅटो आमटी
1. तूरडाळ कुकरला नेहमीप्रमाणे शिजवावी
2. 1 मोठा टोमॅटो चिरून ठेवावा
3. कुकर गार झाला की डाळ काढून ठेवावी आणि चमच्याने थोडी मॅश करावी.
4. भांड्यात 3 चमचे तेल घालून ते धुरावले की मोहरी जिरे हिंग घालून ते तडतडले की त्यात टोमॅटो परतावे
5. टोमॅटो मऊ झाले की त्यात klm आणि मीठ घालून 1 मिनिट परतावे.आणि तूरडाळ घालून नीट ढवळत राहावे.
6. सर्व एकजीव झाल्यावर आणि उकळी आल्यावर बंद करावे.
7. मऊ भातासोबत वरून तूप घालून खावे.आम्ही अप्पम बरोबर खाल्ले.

प्रयत्न5-टोमॅटो अप्पम
1. याची तयारी 1.5 दिवस आधी चालू करावी.1 वाटी तांदूळ 7 तास भिजवावे.नंतर त्यात अर्धी वाटी पोहे, 1 चमचा शिग टाकून (हिपड स्पून) मैदा, हवे असल्यास ओले खोबरे घालून एकदम गंधगोळी वाटावं.
2. आता यात मीठ घालून आणि पाण्यात मिसळलेले ड्राय यीस्ट घालून नीट मिसळून उबदार जागी ठेवून विसरून जावे.
3. सुमारे 20 तासांनी किंवा उकाडा असल्यास आधी मिश्रण फरमेन्ट झाले असेल.त्यात चिरा पडल्या असतील.
4. टोमॅटो प्युरी टाकून नीट मिक्स करावे.मिश्रण पातळ हवे.पळीवाढे.
5. अप्पम चिट्टी(हा साधा झाकणाचा उथळ नॉन स्टिक तवा असतो.कोणतेही अंतर्वक्र पॅन चालेल.) नीट तापवून त्यात पळीने मिश्रण ओतून लगेच कढई हाताने धरून गोल गोल हलवावी.मिश्रण कडेपर्यंत गेले पाहिजे.मध्ये खूप जाड नको. आणि झाकण ठेवावे.सुमारे 2 मिनिटांनी याला मस्त जाळी पडून कडापासून वेगळे होईल.गरम गरम अंतर्वक्र अप्पम काढून दुसरा टाकावा.मी जो अप्पम चा भाग टोमॅटो मेणबत्ती लावून झाकला आहे तो जाळी न पडलेला दडस झालाय.कारण तांदूळ घाईत नीट बारीक वाटले नाहीत.पण तुमचे असे होणार नाही, घाबरू नका.सच और साहस है जिसके मन मे, अंत मे जीत उसीकी रहे.

प्रयत्न6-फेटा टोमॅटो सलाड
1. फेटा अतिशय खारट असते.त्यामुळे त्याचा सामना करायला टोमॅटो चा आंबटपणा लागतो.
2. टोमॅटो उभ्या फोडी आणि अगदी बारीक फेटा क्यूब नीट मिसळावे.
3. याचे सद्गुण अजून वाढवायला यात 1 मोठा चमचा सनफ्लॉवर सीड घालून लगेच खावे.
4. फेटा नसल्यास पगडी म्हणजे नॉर्मल पनीर क्यूब पण पळतील. तुकडे बारीक करा.