पाककृती स्पर्धा १: जिन्नस एक, पदार्थ अनेक

नमस्कार मायबोलीकर मंडळी!

साधारणपणे एका पदार्थाचा / जिन्नसाचा वापर आपण एखाद्याच पाककृतीपुरता मर्यादित ठेवतो. पण त्याच पदार्थापासून वेगवेगळ्या चवींचे, वेगवेगळ्या रूपांचे पदार्थ तयार करून एक छानशी थाळी सजवली तर?

यंदाच्या पाककृती स्पर्धेत हीच कल्पना घेऊन एकाच घटक पदार्थापासून एक कल्पक थाळी तयार करायची आहे.

उदाहरणार्थ, भोपळा निवडला तर भोपळ्याची भाजी, भोपळ्याची पुरी, भोपळ्याच्या सालीची चटणी, भोपळ्याच्या बियांचा कोशिंबिरीत वापर किंवा भोपळ्याच्या फुलांची भजी अशा अनेक शक्यता आजमावता येतील. निवडलेल्या पदार्थाचे वेगवेगळे खाद्य भाग उपलब्ध असल्यास त्यांचा उपयोग करून या कल्पनेला आणखी वेगळे रूप देता येईल.

चला तर मग, एका पदार्थाची किती रूपं करता येतात ते पाहूया!

एक पदार्थ, अनेक रूपं आणि एक कल्पक थाळी!

नियम
१. प्रवेशिका पाठवण्यासाठी मायबोली गणेशोत्सव २०२६ या ग्रुपचे सदस्यत्व घेणे आवश्यक आहे. हा ग्रूप सदस्यनोंदणीकरता १४ सप्टेंबर रोजी खुला करण्यात येईल.

२. नवीन लेखनासाठी पाककृती हा पर्याय निवडा.

३ प्रवेशिकेचे शीर्षक पुढीलप्रमाणे द्यावे. पाककृती स्पर्धा १- तुमचे सदस्यनाम - निवडलेला मुख्य घटक

४. स्पर्धेसाठी एक मुख्य घटक निवडून त्याचा वापर करून एक थाळी तयार करावी.

५. थाळीतील किमान तीन पदार्थांत निवडलेल्या मुख्य घटकाचा ठळक आणि ओळखू येईल असा वापर असावा.
तीनच पदार्थ असलेली मिनी थाळी सुद्धा चालेल.

६. आवश्यकतेनुसार इतर पूरक घटक, धान्य, पीठ, मसाले इत्यादि साहित्य वापरता येईल.

७. निवडलेल्या मुख्य पदार्थाचे वेगवेगळे खाद्य भाग उपलब्ध असल्यास त्यांचा विविध पदार्थांमध्ये वापर करता येईल. मात्र त्या पदार्थाचे सर्वच भाग वापरणे बंधनकारक नाही.

८. फक्त खाण्यायोग्य आणि सुरक्षित भागांचाच वापर करावा.

९. प्रवेशिकेसोबत संपूर्ण थाळीचा फोटो, तसेच मुख्य घटक वापरलेल्या प्रत्येक पदार्थाची स्वतंत्र पाककृती द्यावी.

१०. प्रवेशिकेला "मायबोली गणेशोत्सव २०२६" अशी शब्दखूण द्यावी.

११ . प्रवेशिका देण्याची अंतिम मुदत शुक्रवार, २५ सप्टेंबर २०२६, अमेरिकेतील पॅसिफिक टाइम झोननुसार रात्री १२ वाजेपर्यंत आहे.

१२. एक सदस्य कितीही प्रवेशिका देऊ शकतो.

१३. स्पर्धेचा निकाल मतदानाने ठरवण्यात येईल.

गणपती बाप्पा मोरया!