एक आहे बापट

(निवेदन)
मी लेखिका किंवा कवियत्री नाही. पण जेव्हा भावना तीव्र असतात तेव्हा मला काहीतरी लिहावसं वाटतं.
कधी ते गद्य असतं किंवा कधी ते पद्य असतं किंवा कधी ते ग-पद्य पण असू शकतं. भावना लक्षात घेऊया ना.
(संपलं)

एक आहे बापट, तो मुळीच नाही तापट
उंची आहे कमी त्याची, शरीरयष्टी माफक

मधल्या आळीतल्या अंतूच्या तैलबुद्धीसकट,
पुण्यात येऊन त्यानं आणली की हो आफत

"पुणे तेथे काय उणे" उक्ती झाली खोटी,
डीजेच्या आठवणीनंही धडधडते छाती

सरळ साधी मागणी त्याची होती एकच फक्त
रस्ते हवेत मोकळे आणि ध्वनी प्रदूषण मुक्त

सार्वजनिक उत्सवांनी सोडलंय समाजभान
ढोलताशांच्या घोषांनी वितळत चाललेत कान

सभागृहाला सवाल केला अचूक मुद्द्यांवरी
गदारोळ माजला, गाडी घसरे गुद्द्यांवरी

एकांडा शिलेदार हा व्यवस्थेशी लढतो आहे
विचार-अभ्यास-तर्कानं दांडग्यांना नडतो आहे

नाही वल्गना फुकाच्या, नाही शिव्याशाप
ज्याच्या त्याच्या पदरामध्ये टाकतो नेमकं माप

इंग्लिश, संस्कृत, लॅटिन, मराठी ही दणकट
घरी याच्या पाणी भरती, युक्तिवादही बळकट

आधी त्याला गल्लीतलं कुत्रंही नव्हतं ओळखत
एका रात्रीत स्टार झाला नाव विद्यानंद बापट