इशारा

(वृत्त - जलौघवेगा)

तुफान धारा, नसे निवारा
सखे तुझ्या दे, मनात थारा

जरी बुडाली, पुरात नौका
हव्यात लाटा नको किनारा

विषावरीही उपाय असती
तुझ्या खुळाला नसे उतारा

जिथे धनाचा बडा दरारा
खरेपणाला तिथे न थारा

गुलाब, चाफा फिके सख्या रे
तिच्या स्मृतींचा सुगंध न्यारा

तुझीच गाणी अजून ओठी
अजून देही तुझा उबारा

अशी कशी अजब लोकशाही
समान येथे, समाज सारा

कसे सुखाने घरात यावे?
असे व्यथेचा खडा पहारा

अजून विद्या, काय हवे तुज?
तुला समजला, तिचा इशारा

-विद्याधीश