गझला

(वृत्त - आनंदकंद)

श्वासात सूर ताजे, ओठी उदास गझला
हर्षास टाळण्याचा, निष्फळ प्रयास गझला

या मैफलीत आता, माझे न कार्य उरले
कोणी न येथ माझा, देऊ कुणास गझला?

गेला जरी फुलांचा हंगाम दूरदेशी
ओसाड जीवनाला, देती सुवास गझला

भट्टीत वास्तवाच्या, स्वप्नांस जाळले मी,
घडवून घेतल्या ह्या, त्यातून खास गझला

आले कुणी न जेव्हा, होती गरज उबेची
होऊन दोस्त आल्या, भेटावयास गझला

घरदार सोडुनी मी, रानवनात फिरतो
गझलाच अन्न वस्त्रे, माझा निवास गझला

पाऊस थांबण्याचे दिसते न चित्र "विद्या"
बहुतेक ऐकवील्या कोणी नभास गझला

-विद्याधीश