एआय टूल्सचा ऑनलाईन चर्चेत वापर उपयोगिता, -खबरदारी आणि प्रोत्साहन

एआय टूल्स चा मी तज्ञ नाही. मी फक्त वापर करतो. ते वापरायला सोपे आहेत आणि सोयीचे आहेत.
पण त्याच्या काही मर्यादा जाणवल्या आहेत. आता ऑनलाईन चर्चामधे एआयचा वापर होणार. त्याला कोण थांबवणार ? तो करू नये असे काही युजर्स म्हणतात. हे पटण्यासारखे नाही. वापर व्हावा पण त्यासाठी काही नियम,संकेत पाळले तर हा वापर त्रासदायक होणार नाही.

म्हणून या टूल्ससंबंधी त्यांच्या मर्यादा आणि शक्तीस्थानं यांची माहिती यावर तज्ञांनी माहिती द्यावी. हे एआय टूल्स तुमच्याशी मस्त गप्पा मारतात. त्या गप्पा मारताना तुमचं एक प्रोफाईल ते तयार करतात. त्याप्रमाणे तुम्हाला उत्तरं पुरवतात. तुम्ही जर तर्कनिष्ठ, भावनाशून्य, अभ्यासावर आधारीत उत्तरं मागता हे लक्षात आले तरच तो डीप सर्च देऊ लागतो. अन्यथा तो मेनस्ट्रीम उत्तरातून तुम्हाला उत्तरं देतो.
तुम्हाला अनेक वेबसाईट्सवर रिलेव्हन्स / पॉप्युलॅरिटी / प्राईस / डेट असे फिल्टर मिळतात. तुमच्या आवडीप्रमाणे तुम्ही तो सिलेक्ट करतात. मग सर्च रिझल्ट त्याप्रमाणेच मिळतात. तसेच या टूल्स मधे असे फिल्टर न देता तुमच्या प्रश्नांचा रोख समजून घेऊअ आपोआप फिल्टर सेट केला जातो.

हे टूल्स सांगतात कि मी जर सखोल माहिती द्यायला भाग पाडले, या एआय टूल्सने मेनस्ट्रीम माहितीवर आधारीत माहिती पुरवणे चुकले हे मान्य केले तरी अन्य युजरला तो नवी माहिती देईल असे काही नाही. तो म्हणतो कि मला वापरकर्ता कोण हे माहिती नसते. मला भावना नाहीत. मी कोणत्याही विचारधारेचा समर्थक नाही आणि दुश्मनही नाही.

पण हे टूल्स शेवटी कमर्शियल उद्दीष्टाने बनवलेले आहेत. त्यामुळं त्याच्या ट्रेनिंग मधे लोकांच्या भावनिक मान्यतांचा समावेश केला आहे. तुमच्या प्रश्नातून तो तुमच्या भावनिक मान्यता ठरवतो आणि त्याप्रमाणे तो उत्तर देतो. एखाद्याला तेव्हढे पुरेसे असेल तर पुढे त्याला उत्तर दिले जात नाही. पण या उत्तराला कुणी क्रॉस क्वेश्चनिंग केले कि एआय सावध होतो आणि आता आपल्याला जास्त काम करावे लागणार आहे हे त्याला कळते. मग तो अचूक उत्तराकडे वाटचाल सुरू करतो.

असा युजर भेटला कि मग एआय चुका टाळण्याकडे लक्ष देतो. झालेल्या चुकांबद्दल माफी मागतो. इथून पुढे काळजी घेईन असेही म्हणतो. इथे त्याने वापरकर्ता हा ओपन आहे हे ओळखलेले असते. याला भावनेशी घेणं देणं नाही हे त्याने ताडलेलं असतं. मग तो त्याला अचूक उत्तर देतो किंवा माझ्या मेमरीत ते उत्तर नाही असे कबूल करतो. ते मिळवण्यासाठी काही सूचनाही करतो. म्हणजे अमूक एक पुस्तक मिळत नाही. तर ते कमी चर्चेत असावे किंवा लेखकानेच प्रकाशित केले असेल, आयएसबीएन नंबर नसेल, मान्यताप्राप्त प्रकाशक नसेल तर मी शोधू शकत नाही. तुम्ही हा लेखक कुठे राहत होता तिथे जाऊन आजूबाजूला विचारा असे तो सांगतो.

बरं ही माहिती देणार्‍याची ओळख तो आयपी अ‍ॅड्रेस किंवा अन्य अशा ओळखीने ठेवतो का ? तर नाही. तो प्रश्नाच्या रोखावरूनच ठरवतो कसे उत्तर द्यायचे. म्हणजेच प्रश्नांचा हा संच जगाच्या दुसर्‍या कोपर्‍यात अन्य युझरने उभा केला तर त्यालाही एआय तसेच उत्तर देईल. पण मी लॉग आउट केल्यानंतर माझ्याच संगणकावर जर माझी धाकटी बहीण आली आणि तिने तिच्या बुद्धीनुसार त्याच विषयावरचे तेच प्रश्न विचारले तर त्या प्रश्नांचा रोख पाहून तिला वेगळे उत्तर मिळेल.

यामुळे माझी बहीण माझ्याशी "मला सुद्धा चॅट जीपीटीनेच उत्तर दिलेय , तोच सेम प्रश्न मी विचारला " असे म्हणून आवाज चढवू शकते.
पण तिने आव्हान दिलेले नसते.
संदर्भ मागितलेले नसतात.
तिचे वाचन शून्य असल्याने तिने स्वत:च्या आकलनानुसार एआय ला व्हेरीफाय करायला सांगितलेले नसते.

माझी धाकटी बहीण जेव्हां ऐकून घ्यायला शिकेल तेव्हां मी तिला एआय उत्तर कसे बदलतो याचा डेमो देईल. सध्या तिला डोकं देणं म्हणजे वेळ वाया घालवणं आहे.

तुम्हाला असे अनुभव आले आहेत का ?

असेल तर एआय चा चांगल्या पद्धतीने वापर करता यावा यासाठी काय नियम बनवावेत ? काय संकेत बनवावेत ?
इथे एका युजरने म्हटले होते कि एआयचा वापर केला तर तसे म्हटले पाहीजे. फाईन. पण ही अट कंपल्सरी नसावी. तुम्ही कशाचाही वापर करा,माहिती ऑथेंटिक असावी. याच युजरच्या अटीनुसार अन्य एका युजरने एआयचा हवाला दिला पण माहिती कॉपी करून ती एडीट केली आणि त्यात हवे तसे उत्तर भरले आणि एआय चे उत्तर म्हणून पेश केले. मग त्याला प्रामाणिक म्हणायचे का ?

चर्चेत भाग घेणार्‍यांना अचूक उतर मिळावे. त्यासाठी अनेक कंगोरे खंगाळावे लागतात. इथे सर्वसामान्य युजर्सच असतात. नाहीतर संशोधकांचा अड्डा झाला असता. त्यांच्या चर्चेत काही कळत नाही. कारण एका विशिष्ट लेव्हलला सगळे आहेत हे गृहीत धरले जाते. इथे आपण पॅन कार्ड हरवले तर दुसरे कसे मिळवावे इथपासून चर्चा करत असतो.

तेव्हां दिशाभूल होऊ नये यासाठी काय केले जावे ?
एआयने काय सुविधा द्याव्यात जेणेकरून कुणीही एआय ची म्हणून दिलेली माहिती पडताळून पाहता येईल ?