शशक २ - शहाणा नवरा - माबो वाचक

सीमा आरामखुर्चीत रेलून बसली होती. मोबाईलवर ती मायबोलीवरच्या शतशब्दकथा स्पर्धेचे नियम वाचत होती. इतक्यात तिचा नवरा, रमेश, बाजारातून भाजी घेऊन आला. त्यालाही कळावे म्हणून तिने मोठ्याने वाचायला सुरुवात केली.
“मला वाटले नव्हते, तू कधी असा वागशील”
हे ऐकून रमेशने सीमाचे पाय धरले. तो गयावया करत म्हणाला, “चूक झाली. यावेळेस माफ कर. पुन्हा असे होणार नाही.”
“अरे रमेश, माझे पाय सोड पाहू आधी,” सीमा त्राग्याने म्हणाली. “मी तुझ्याशी बोलत नव्हते, मोबाईल मध्ये वाचत होते.”
“ओह,” रमेश ओशाळून म्हणाला.
“पण तू कशाबद्दल माफी मागितलीस?” रमेशकडे संशयाने पाहात सीमा म्हणाली.
“सीमा, तुझ्या मते दिवसाला माझ्याकडून हजार चूका होतात. मला वाटले, त्यातलीच एखादी असेल.”