पाककृती स्पर्धा क्रमांक १ - शिरा सजावट - स्वाती_आंबोळे

साद्यंत आणि सचित्र पाककृती अशी:

१. दीड कप रवा अर्धा कप तुपात खमंग परतून घेतला.
२. त्यात आधी दोन कप गरम पाणी आणि मग केशर खलून घातलेलं एक कप गरम दूध घालून झाकून फुलवून घेतला.
३. त्यात सव्वा कप साखर घातली आणि कडेने आणखी तूप सोडून छान दमदमीत वाफ आणली.

वेलचीपूड घालून तयार शिरा:

४. आता यातला अर्धा शिरा बाजूला काढला, आणि उरलेल्या अर्ध्यात कपभर आमरस आणि आणखी थोडं तूप घालून घट्ट होईपर्यंत परतून घेतला.

५. दोन्ही शिरे निवू दिले.
६. आता सजावटीची तयारी करून घेतली.

७. त्या कात्रीसारख्या दिसणाऱ्या बॉलरने शिऱ्याचे घट्ट गोळे करून लॉलीपॉपच्या काड्यांना टोचून घेतले.
८. व्हाइट चॉकलेट मेल्ट करून घेऊन त्याने हे गोळे (माझ्या मुलाने, आदित्यने) सजवले.

८. त्या कपात आधी शुगर इन द रॉ भरली होती, पण त्यात हे शिऱ्याचे पॉप्स वजनामुळे नीट उभे राहीनात, मग त्यात शिराच दाबून भरला आणि त्यात ते पॉप्स खोचले.

९. दुसरीकडे पांढऱ्या शिऱ्याची कोरडेपणासाठी चमचाभर मिल्क पावडर घालून वळकटी करून घेतली. आंब्याच्या शिऱ्याची ‘पोळी’ लाटून त्यात ही वळकटी गुंडाळली.

१०. वळकटी गार करून तिच्या वड्या कापून घेतल्या.

११. हा आदित्यने उरलेल्या वड्यांचा केलेला गणपती:

मोरया!