अ‍ॅपल पाय

गेल्यावर्षी ख्रिसमसला मी सेवरी पाय (रिकोटा, फेटा चिज आणि पालक घालून) केला होता. पण पुन्हा केला गेला नाही. ह्या वर्षी थँक्स गिव्हिंगला काय मेन्यू करावा हे ठरत नव्हतं. घरात असलेल्या गोष्टींमधूनच, फार तयारी/खरेदी करावी लागणार नाही असच काहीतरी करायचं होतं. सकाळी निवांत उठल्यावर ठरलं की वडापाव करूया! मग त्याच्या जोडीला घरात असलेला सालमन ग्रील करून आणि भाज्या रोस्ट करून घेऊया. घरात केळी आणि सफरचंद होती. पण मग गोड म्हणून अगदीच शिकरण करण्याऐवजी अ‍ॅपल पाय करायचं ठरवलं!

अ‍ॅपल किंवा कुठलाही पाय करताना दोन उप-कृती वापराव्या लागतात. एक म्हणजे पाय क्रस्ट आणि दुसरी म्हणजे सारण. पैकी सारण गोड किंवा तिखट दोन्ही करता येतं आणि दोन्ही साठी क्रस्टची कृती सारखीच असते. मी दोन्ही वेळी बटर क्रस्टच केलं होतं पण बाकीही काही प्रकारे करतात म्हणे. तयार क्रस्ट बाजारात मिळतं पण मला घरीच करून बघायचं होतं.

१. एका मध्यम आकाराच्या भांड्यात मैदा, साखर आणि मीठ एकत्र करून घेतलं.
२. थंडगार बटरचे सुरीने अगदी बारीक तुकडे करून घेतले. कांदा जाडसर चिरताना जेव्हड्या जाडीचे तुकडे होतात साधारण तसे करायचे. अर्धा सेमीचे.
३. बटर वरच्या मिश्रणात घालून हाताने एकत्र केलं.
४. थोडं थोडं पाणी घालत आधी काट्याने आणि मग लागेल तसं हाताने एकत्र केलं. पाणी बर्फाचं/थंडगार हवं. एकत्र करताना शक्यतो काटा वापरावा म्हणजे हाताच्या उष्णतेने बटर वितळत नाही. पाणी लागेल तसच घालत/ शिंपडत रहावं.
५. सगळं पीठ मिसळलं गेलं आणि गोळा एकत्र होईल इतपतच एकत्र करावं. ह्यात पाणी खूपच कमी आहे आणि मळायचं पण अजिबात नाहीये.
६. पीठाचा गोळा प्लॅस्टीक रॅपमध्ये बांधून फ्रीजमध्ये ठेवला.
७. दरम्यान सफरचंद सोलून, त्याचे तुकडे करून घेतले.
८. सफरचंदाचे तुकडे, साखर, मीठ, दालचिनीची पुड आणि लिंबाचा रस सगळं एकत्र करून घेतले. सफरचंद आंबट असतील तर लिंबाचा रस कमी घालावा पण थोडातरी घालावा कारण लिंबाच्या ताज्या रसाचा स्वाद छान लागतो.
९. साधारण १५ मिनीटांनी फ्रीजमधून पिठाचा गोळा बाहेर काढून त्याचे दोन भाग केले.
१०. ९ इंचाच्या पाय डीशमध्ये बसेल एव्हडी पोळी लाटून घेतात. पीठ साधारण शंकरपाळ्याच्या पीठासारख असतं (लाटताना त्याला भेगा पडू शकतात). पोळीची जाडीही शंकरपाळे करताना ठेवतो तेव्हडीच ठेवावी. मी ह्यावेळी चार लहान पाय करता येतील अशी डीश वापरली. त्यामुळे मोठी पोळी लाटून त्याचे कातण्याने चार गोल करून घेतले.
११. ही पोळी पायडीशमध्ये पसरून घेतली आणि त्यावर सफरचंदाचं मिश्रण घातलं. भरपूर दाबून बसवावं कारण बेक करताना उष्णतेने सफरचंद आक्रसतात आणि मग पायचे खुळखुळे होतात.
१२. पिठाच्या दुसर्‍या भागाची थोडी लहान पोळी लाटली आणि ती मिश्रणावर ठेवावी.
१३. बाहेरची पोळी आतल्या पोळीवर दुमडून घेतली आणि बोटाने दाबून पाय सील करून टाकला. करंज्यांची मुरड घालतात तसं बोटांच्या चिमटीने कडेला मुरड घालून घेतली.
१४. सुरीचे वरच्या थराला थोड्या खाचा मारून घेतली म्हणजे वाफ बाहेर जायला मदत होते.
१५. अवन ३७५ डिफॅला प्रिहीट करून त्यात पाय बेक केला. पहिल्या पंधरा मिनिटांनी तापमान ३५० डिफॅ केले. एकूण साधारण ५० मिनिटांमध्ये सोनेरी रंग येतो. सुरीने वरचा थर झाला आहे ना ते बघून अवन बंद केला.

हा कापलेला

भरपूर बटरमुळे छान फ्लेकी पाय होतो. साखरेचं हे प्रमाण एकदम बरोबर आहे. अजिबात जास्त गोड होत नाही. मला सफरचंदाच्या फोडी थोड्या कमी शिजलेल्या चालल्या असत्या (जरा क्रंची) पण आधी बंद केलं असतं तर मग पिठ कच्च राहीलं असतं.

हा स्पिनॅच पाय (बेक करण्यापूर्वी)

बेक करून