आई, भिती वाटतेय ग

आई भिती वाटतेय ग आजूबाजूला लपलेल्या बुआ ची..
माझ्या मनाला बाऊ झालाय, त्यावर घाल न ग फुंकर.
खोडी काढलीय आयुष्यानं, त्याला कर न हात रे...
कट्टी केलीय सुखशांतीनं जणू, त्यांना सांग न माझ्याशी बोलायला..
वाईट्ट लोकांनी त्रास दिलाय ग, त्यांचं घर बांधशील उन्हात?
काळा राक्षस आताशा दिवसापण येतो, घाबरवतो..
त्याला चिरडून टाक न हातावर.
खूप भूक लागलीय, भरव न चार घास सुखाचे. एक घास गोविंदाचा एक श्रीरामाचा, एक राधेचा एक सीतेचा..
गोष्ट सांग न एखादी छान छान... जिचा शेवट असेल खात्रीशीर गोड.
झोपू दे तुझ्या हातावर, तुझ्या कुशीत.. येऊ दे तुझं हे पिल्लू आज तरी खुशीत!
माझी मलाच नजर लागलीय बहुतेक, लावशील काळं तीट?
मी घरी लवकर यावं म्हणून ठेवशील वाटीखाली मीठ?
-पल्ली