कथाशंभरी - जॉनी जॉनी

बर्‍याच दिवसांनी दोघींना मोकळा वेळ मिळाला होता. नाही म्हटले तरी काही वर्षे लोटली होती. पूलाखालुन बरेच पाणी वाहून गेले होते. अचानक एकीचे लक्ष तिकडे गेले. अरे हे काय .......

"आपल्या सोबतीला बघ कोण आलंय."

"अय्या ! कित्ती दिवसांनी बघतेय मी तर बाई या जॉनीला. नवीन रुपात किती क्यूट वाटतोय गं."

"पण जरा काळा झालाय नै."

"चालवून घेऊ."

"हा एवढा वेळ काढून आलाय म्हणजे कायतरी विशेष कारण असणारे नक्कीच."

"किती वर्षे आपण दोघी कपाटातच अडकून गेलेलो. आता मात्र पुन्हा एकवार खेळ रंगणार. तू, मी आणि जॉनी."

असे सर्व बोलणं सुरु असतानाच जेडब्ल्यू-ब्लॅक लेबल, ग्रीन टी आणि सोडा ओतून रघूने आपलं कॉकटेल बनवले.