जुळलेच नाही

जुळवुनी मी घेतले पण आपले जुळलेच नाही
कोणत्या स्वप्नात होतो हे मला दिसलेच नाही

प्रश्न होते गावभर अन वेसही संदिग्ध होती
उत्तराचे चाक पण रस्त्याकडे वळलेच नाही

तू मला सांगायचे अन मी तुला बोलायचे अन
ह्या अश्या पेचामधे थकले ऋतू कळलेच नाही

अंगणाच्या शेवटी जी कुंपणाची धाव होती
हे असे नात्यातले अंतर मला रुचलेच नाही

अत्तराचा शौक होता श्वास माझे मुक्त नव्हते
गंध जो भिडतो नभाशी गाठणे जमलेच नाही

मोजले आयुष्य हे परडीत वाढुन तू दिलेले
फसवुनी आयुष्य गेले ते जरी फसलेच नाही

- रोहित