पावसाळी दुपार हो की तू

Submitted by बेफ़िकीर on 3 July, 2020 - 04:29

पावसाळी दुपार हो की तू
ओलसरसा विचार हो की तू

गच्च आभाळ मागणी करते
टाळलेला नकार हो की तू

काय वातावरण तुफानी हे
जाउया चल, तयार हो की तू

ज्यामुळे शुष्कता समजते तो
जीवघेणा तुषार हो की तू

पंख नसल्यामुळे इथे आहे
जग म्हणे जा, फरार हो की तू

पार कंगाल मी खयालांनी
आज कविते उदार हो की तू

तेच ते, तेच ते सुरू आहे
एक अनवट थरार हो की तू

येत बसतात नित्यनेमाने
त्या ऋतूंचा जुगार हो की तू

थांबले 'बेफिकीर' का लेखन
चल पुन्हा बेसुमार हो की तू
=====

-'बेफिकीर'!

विषय:

काव्यलेखन

शब्दखुणा:

पावसाळी दुपार हो की तू

Groups audience:

गुलमोहर - गझल

Group content visibility:

Public - accessible to all site users

शेअर करा

खूपच मस्त. बेफिकीर दादा. फक्त

खूपच मस्त. बेफिकीर दादा. फक्त लेखन थांबवू नका. आमच्या सारख्यांचे प्रयत्न आत्ता आत्ता सुरू व्हायला लागलेत. तुम्हीच लिहीलेले लेख वाचतोय
गझल कशी असावी याबद्दल!! बरच लिहूनठेवलय तुम्ही. मनापासून धन्यवाद!! मयेकर दादांनी तुमच्या लेखनाच्या लिंक्स दिल्या.

Submitted by प्रगल्भ on 3 July, 2020 - 10:08