लॉक डाऊनच्या ओव्या

Submitted by हर्षल वैद्य on 20 April, 2020 - 03:40

विश्वाच्या आरंभी | एकले ते शून्य |
केवल अनन्य | स्वयंपूर्ण ||

एकलेपणाचा | त्यास ये कंटाळा |
सोबत्यांचा मेळा | हवा वाटे ||

आदिकांक्षेतून | द्वैताचे जनन |
विश्व प्रसरण | पावू लागे ||

काळाचा प्रवाह | अनादि अनंत |
त्यास ना उसंत | कशाचीही ||

कार्य कारणाची | साखळी अनंत |
तोडी ज्ञानवंत | शून्यभोगी ||

द्वैताच्या कांक्षेचा | एकत्वी विलय |
त्यासी प्रत्यवाय | काही नाही ||

एकत्वाच्या भावी | स्थिरचित्त होणे |
शून्यत्वा नेणणे | सत्यमार्ग ||

विषय: 
काव्यलेखन
शब्दखुणा: 
ओव्या
Groups audience: 
गुलमोहर - कविता
Group content visibility: 
Use group defaults
शेअर करा