तुम्ही तुमच्या मुलांची नावे कशी ठेवली?

माझ्या मुलाचं नाव आम्ही विक्रमादित्य ठेवले आहे. त्याला आम्ही विक्रम म्हणतो. माझ्या नवऱ्याचे माहेर उज्जैन आहे आणि तिथली आठवण म्हणून आम्ही हे नाव ठेवले.
मुलगी झाली असती तर मी माधुरी पुरंदरे यांच्या "राधाचे घर" मधून राधा नाव ठेवणार होते.
विक्रमादित्य असे नाव ठेवणार हे कळताच माझ्या आईनेच आधी खूप विरोध केला. पण आता ती एकटीच त्याला विक्रमादित्य अशा संपूर्ण नावाने हाक मारते. अजून विरोध होऊन आमचा बेत रद्द होऊ नये म्हणून आम्ही दुसऱ्या दिवशी बर्थ सर्टिफिकेटवरच नाव घालून आणले. आमची बरेच लोक या नावामुळे थट्टा करतात. आणि मलाही टेन्शन आहे की पुलंसारखं "नाव लावायचं राजे भोसले, आणि चालवायची पिठाची गिरणी" असं झालं तर?

सई, त्याचं काय म्हणणं आहे? त्याला त्याचं संपूर्ण नाव आवडतं का, कि विक्रमच आवडतं?

माझ्या मुलीचं सरळ साधं सोपं सुंदर 'रमा' नाव ठेवलंय..
हाक मारायला सोपे जाईल, शक्यतो जोडाक्षर नको, unique नावाच्या भानगडीत अर्थ नसलेले किंवा जोडजोडी केलेले नाव नको अशा प्रमुख अटी होत्या.. (असेही आमचे आडनाव अत्यंत unique असल्यामुळे नाव कॉमन चालणार होते)

विक्रमादित्यला त्याच्या नावाचा जाज्वल्य अभिमान आहे.
मी विक्रमादित्य, उज्जैनचा राजा अशी ओळख करून देतो तो स्वतःची

माझ्या मुलाचं नाव मला प्रथमेश ठेवायचं होतं कारण गणपती बाप्पा च एक नाव पण आणि माझ्या नावाच पण पहिले अक्षर प्र... दोन्ही इच्छा पूर्ण होतील. पण माझ्या आईने विरोध केला का तर तुझ्या सारखा आगाऊ आणि हट्टी होईल म्हणून मग अथर्व नाव ठेवलं.....

मला पण एकमेव नाव पाहिजे होतं म्हणून मुलाचं नाव वरिष (वर देणारा देव - विष्णु) ठेवलं... या नावाच्या इंग्रजी अक्ष्ररांमध्ये माझे आणि बायकोचे पहिले इंग्रजी अक्षर येते... नंतर कन्यारत्न झाले..तेव्हा असंच नाव शोधत होतं ज्याचात आमच्या तिघांचे इंग्रजी आद्याक्ष्रर येईल आणि नाव ठरलं... शर्वी (पवित्र्य)... दोन्ही मुलाच्या नावाच्या इंग्रजी स्पेलिंगमध्ये सारखीच अक्षरे आहेत...

माझ्या माहेरी सगळे मराठी साहित्यात पारंगत असल्याने आमची सगळ्यांचीच नावे खूप वेगळी आणि अर्थपूर्ण आहेत. आमची ही स्पेशालिटी पाहून बाळ झाले किंवा होणार असले की आमच्याकडे नाव काय ठेऊ हे विचारायला यायचे
त्यातील बरीचशी नावे आता 50/60 वर्षाने कॉमन वाटतात. साहजिकच आमच्या पुढच्या पिढीवर ही परंपरा जपण्याची जबाबदारी होती. आम्ही ही यथाशक्ती निभावली.
माझ्या थोरल्या लेकीचे नाव ओवी ठेवले पण आता अभंग श्लोक अशी रांग सुरू होणार का अशा आचरट प्रश्नांना सामोरे जावे लागे. तिचे दुसरे नावही होते जे पुढे आले आम्ही आता घरातले तिला ओवी म्हणतो.दुसऱ्या लेकीचे नाव मनोज्ञा.म्हणजे लक्ष्मी ती कोजागिरी पौर्णिमेची आहे

माझ्या माहेरी सगळे मराठी साहित्यात पारंगत असल्याने आमची सगळ्यांचीच नावे खूप वेगळी आणि अर्थपूर्ण आहेत. आमची ही स्पेशालिटी पाहून बाळ झाले किंवा होणार असले की आमच्याकडे नाव काय ठेऊ हे विचारायला यायचे
त्यातील बरीचशी नावे आता 50/60 वर्षाने कॉमन वाटतात. साहजिकच आमच्या पुढच्या पिढीवर ही परंपरा जपण्याची जबाबदारी होती. आम्ही ही यथाशक्ती निभावली.
माझ्या थोरल्या लेकीचे नाव ओवी ठेवले पण आता अभंग श्लोक अशी रांग सुरू होणार का अशा आचरट प्रश्नांना सामोरे जावे लागे. तिचे दुसरे नावही होते जे पुढे आले आम्ही आता घरातले तिला ओवी म्हणतो.दुसऱ्या लेकीचे नाव मनोज्ञा.म्हणजे लक्ष्मी ती कोजागिरी पौर्णिमेची आहे

आम्हाला शंकराच्या नावावरुन युनिक नाव ठेवायचे होते म्हणून नभ्य हे नाव ठेवलेय .उच्चार चुकीचा करतात बर्याचदा लोक पण हा बरोबर उच्चार कसा करायचा ते सांगतो

वरिष या शब्दाचा अर्थ वर देणारा देव कसा काय? वर + ईश = वरेश होते. वर देणारा म्हणजे वरद आणि वर देणारा देव करायचे असेल तर वरद + ईश = वरदेश होईल. अर्थ गूगल वरून काढला असेल तर 99% चुकीचा असण्याची शक्यता आहे.

मानसी ठेवले तर माणशी होते, मेघना एक आहे सोसायटीत म्हणून गाळावे लागले.

माझ्या बाबांकडे एक संस्कृत- इंग्रजी शब्दकोश होता.‌एकदा तो चाळत असताना नवऱ्याला 'मिहिका' हा शब्द आवडला. अर्थही सुरेख होता. ( दवबिंदू) म्हणून 'जेव्हा कधी मुलगी होईल' तेव्हा मिहिका नाव ठेवायचे ठरले होते. मुलाचे नाव ठरवलेच नव्हते.
आमच्या कडे पाच नावं ठेवतात बाळाची. बाकीच्या नावांची स्टोरी नंतर लिहिते.

आम्ही बडोद्याला असताना माझे बाबा माझ्या कडे आले होते. तेव्हा समोरच्या घरात राहणारी एक छोटी मुलगी येताजाता त्यांच्याशी बोलत असे. दोन वर्षांची असावी. तिचे नाव 'श्रीना' होते. बाबांना ते नाव फार आवडले. त्यामुळे स्वत:च्या नातीसाठी नाव सुचवताना त्यांनी तेच नाव सुचवले. त्यामुळे माझ्या मुलीचे दुसरे नाव आहे ' श्रीना'

आम्हांला 'सई' हे नाव पण फार आवडले होते. पण आजूबाजूला अमराठी लोकच जास्त असल्याने ते 'सई' चे'साई' च होणार हे माहिती होते. म्हणून तिसरे नाव सई ठेवले. पण कागदोपत्री 'मिहिका' आहे.
मिहिकाचेही अमराठी लोक मीका, महिका, महक करतात.

अलीकडेच एका बाईंशी ओळख करून दिली गेली त्यांचं नाव अंगाई होतं. आता हे पाळण्यातले नाव का लग्नानंतर नवऱ्याने ठेवलेलं वगैरे विचारायचा मोह टाळला.
पण इथे लिहीत आहे कोणाला युनिक नाव हवं असल्यास.
आमच्या ओळखीत एका मुलाचं नाव साहित्य पण आहे.

माझ्या भाचीचं नाव विहा ठेवलं.
विहा म्हणजे स्वर्गीय, आकाश.

माझ्या मुलाचं नाव साईश आहे.

या नावाला अर्थ आहे की हा जोडून बनवलेला शब्द आहे काही कल्पना आहे का?>>>
गुजराथी शेजारी होते ते. 'श्रीना' म्हणजे 'देवाने पाठवलेली/देवाची मुलगी' असं काहीसं सांगितले होते त्यांनी.

गुजराथी पेंडश्यांचे चाहते असतील

>>>गुजराथी पेंडश्यांचे चाहते असतील
>>>आमच्या ओळखीत एका मुलाचं नाव साहित्य पण आहे
LOL!!

माझ्या भावाचा मुलगा. पाळण्यात नाव बभ्रुवाहन ठेवले होते, पण सारखा इकडं तिकडं बोकाळत फिरत असतो म्हणून आता त्याचं नाव बोकलत ठेवले आहे.

माझ्या ऐकण्यात एक नाव आलय "निवांत"

भाच्याने मुलाचं नाव मार्कंडेय ठेवलं अमेरिकेत पौराणिक नावाचं कौतुक म्हणून. पण शाळेतल्या मुलांनी त्याला 'मार्क' केलं.
((बास्केटबॉल किंवा फुटबॉल खेळताना 'मार्कंडेय पास द बॉल' म्हणेपर्यंत युगेयुगे लागतील, बॉल जाईल दुसरीकडे)))

एका कुटुंबात प्रसाद,पुजा,,आरती,निरांजन , . . .
शेजाऱ्यांनी काय नाव ठेवायचं? मोक्ष?

मोक्ष हे नाव गुजराती लोकांत फारच लोकप्रिय आहे. ते ह्या नावाच्या मुलांना मोक्स् म्हणतात.

एका कुटुंबात प्रसाद,पुजा,,आरती,निरांजन , . . .
>> शेजाऱ्यांनी यज्ञ, विभुती.. अशी नावे ठेवावीत.

मोक्श् ( मोक्षं म्हणत नाहीत गुजरातीत) मळी गयु केम?
हां ए थोडो मोडो/वहेलो आव्यो।( उशिरा/लवकर आला!)

एका कुटुंबात मुलगी जन्माला आली तीच नाव ठेवलं वीणा.
आता मुलगा जन्माला आलाय, त्याचं नाव काय ठेवायचं? तंबोरा?