फिके चांदणे धूसर वाटा रात वेगळी आहे - (लवंगलता)

फिके चांदणे धूसर वाटा रात वेगळी आहे
कुठे फुलाच्या देठावरती सुटी पाकळी आहे

चंद्र ठिबकतो पाण्यावरती स्वप्न जागते काठी
जुळवित बसतो वेडा कोणी नि:शब्दाच्या गाठी
पणती होउन आस तेवते मंद देवळी आहे
कुठे फुलाच्या देठावरती सुटी पाकळी आहे..

कोरत येते देहावरती आठवणींच्या रेषा
रात्र पोचते डोळ्यांमधुनी स्पर्शफुलांच्या देशा
तिथे ओठ ओठांवर जुळती मिठी मोकळी आहे
कुठे फुलाच्या देठावरती सुटी पाकळी आहे..

जाणवते ना श्वासांनाही भास कुठेसा होतो
झ-यासारखा वाहत वारा तुझ्यापासुनी येतो
नकोस छेडू श्वासांना तू लाज कोवळी आहे
कुठे फुलाच्या देठावरती सुटी पाकळी आहे..

तळे पाहते रातकणांना टिपून घेते सारे
आकाशावर तलम परांनी रेखुन देते तारे
ता -यांना धूसर मेघाची ओढ आगळी आहे
कुठे फुलाच्या देठावरती सुटी पाकळी आहे..

-रसिका