मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
शहीद मेजर कौस्तुभ राणे यांना भावपूर्ण काव्यमय श्रद्धांजली !
शहीद
देशाच्या सीमेवरती
जवान शहीद झाले
डोळ्यांनी अश्रू गाळून
फक्त अभिवादन केले
कोण कुणा पुसणार
काय कुणाचे गेले ?
काठीचा आधार घेऊन
मायबापाचे मूल गेले
स्वप्नांच्या चिंधड्या करून
चिमण्यांचे बाप गेले
कोण कुणा पुसणार
काय कुणाचे गेले ?
अर्ध्यावर डाव मोडून
कुंकू पुसून गेले
कुणाच्या पापापायी
घरदार उध्वस्त झाले
कोण कुणा पुसणार
काय कुणाचे गेले ?
बंदुकीच्या फैरी झाडून
चंदनाच्या चितेत गेले
शाही सन्मान घेऊन
जयघोष निनादत गेले
कोण कुणा पुसणार
काय कुणाचे गेले ?
मरतांना चिंता करीत
आप्त आठवित गेले
देशाची चिंता करून
तिरंगा पांघरून गेले
कोण कुणा पुसणार
काय कुणाचे गेले ?
'देशावर कुर्बान झाले'
म्हणता पाय लटपटले
सूर्योदय आठवून उद्याचा
हृदय पित्याचे तटतटले
कोण कुणा पुसणार
काय कुणाचे गेले ?
- प्रा.अरुण सु.पाटील (असु)
© सर्व हक्क स्वाधीन
