फुलपाखरू

जाऊ घरी तेंव्हा तुझ्या प्रॉब्लेमवर चर्चा करू
बागेत असतानातरी बघ फूल बघ फुलपाखरू

आधी जरा डोक्यातली ही जळमटे काढूत का
मग सावकाशीने मनाचा पोटमाळा आवरू

भाडेकरारावर सही केलीच नव्हती मी मुळी
देहा तुझ्या वट्यातला हा टॅक्स मग मी का भरू

प्रेमात पडले की म्हणे दुनिया दिवाणी वाटते
होऊ शहाणे एकदा ही सोय आपण वापरू

मिष्टान्न वाढावे तश्या तू ठेवल्या एकेक ह्या
नाही कळत आहे मला मी कोणती इच्छा धरू

होते दिवेलागण ,  तुझा पान्हा मला हाकारतो
येते पुन्हा गोठ्याकडे माझ्या मनाचे वासरू

~वैवकु