बेक्ड झुकिनी

Submitted by अमेय२८०८०७ on 1 September, 2015 - 11:09

काल भरली झुकिनी रेसिपी पाहिली तेव्हा ही रेसिपी आठवली. सुदैवाने झुकिनी होतीच त्यामुळे करून टाकली लगेच. झुकिनी जरा नाजूक भाजी वाटते त्यामुळे तिला जास्त तळण्यापेक्षा हलके परतून किंवा ग्रिल्/बेक करून खाणे मला आवडते.

साहित्य :
एक मोठी झुकिनी

स्टफिंगसाठी:
तीन चार मशरुम्स बारीक चिरून, अर्धी लाल सिमला मिर्ची भाजून, एक मध्यम कांदा बारीक चिरून, अर्धा टोमॅटो बिया-गर काढून बारीक चिरून, पाच-सहा लसूण पाकळ्या, एक छोटी हिरवी मिर्ची किंवा पाव चमचा तिखट किंवा पाव चमचा रेड चिली सॉस (ऐच्छिक), रोझमेरी, थाईम किंवा आवडते सीझनिंग/मसाला, चिमूटभर मिरपूड, मीठ आवडीचे चीज

ऑलिव्ह ऑईल दोन मोठे चमचे

zuk1.jpg

कृती

झुकिनी अख्खी ८-१० मिनिटे पाण्यात उकडून घ्या. सुरी आत जाईल इतकीच शिजू दे, जास्त शिजू देऊ नका.
पातेल्यातून काढून थंडगार पाण्यात दोन तीन मिनिटे ठेवा, यामुळे शिजणे थांबेल.
झुकिनी पुसून तिला मधोमध काप द्या, दोन्ही टोकाचा भाग काढून टाका.

झुकिनीच्या दोन्ही कापांवरील बिया आणि त्याखालचा भाग स्कूप करून काढून घ्या. हा भाग टाकू नका, नंतर सारणात घालता येईल. झुकिनीचे छोटे छोटे तुकडे करा. तुकड्यांना पाणी सुटले असेल ते टिपून तुकडे एकदम कोरडे करा.

zuk2.jpg

कढईत ऑलिव्ह ऑईल हलके गरम करा. लसूण खरपूस होईपर्यंत परता, कांदा, भाजलेली लाल सिमला मिर्च (जळकी साल काढून), हिरवी मिरची, टोमॅटो आणि मीठ-मिरपूड तसेच आवडते सीझनिंग घालून चांगले वाफवून घ्या. झुकिनी स्कूप करताना निघालेला गर हाताने पिळून, कोरडा करून तोही मिसळून घ्या.

zuk3.jpg

फिनिशिंगसाठी

मायक्रोवेव्ह २०० डिग्री सेल्शिअसला प्री हीट करून घ्या.
एका मायक्रोवेव्ह ट्रे/बेकिंग डिशमध्ये स्टफिंग भरलेले झुकिनीचे तुकडे ठेवा आणि वर चीज किसून / तुकडे करून टाका.

zuk4.jpg

१०-१२ मिनिटे बेक करा.

आयटम तयार.

zuk5.jpg

झुकिनीला फार पाणी सुटते, त्यामुळे सारण भरण्याआधी फोडी पूर्ण कोरड्या करणे महत्त्वाचे.

मशरूम आवडत नसल्यास बाकी इतर कोणत्याही सुटेबल भाज्या किंवा उकडलेले बटाटे, मटार इत्यादी घालूनही मस्त सारण होऊ शकेल.

नॉनव्हेज सारणही चांगले लागते, मी खिम्याचे आणि चिकनचे करून पाहिले आहे. चिकनसोबत मेयोनीज मस्त लागते, पण सध्या श्रावण यू नो !

स्रोत : नेटवरील विविध रेसिपी

विषय: 
पाककला
Groups audience: 
पाककृती आणि आहारशास्त्र
Group content visibility: 
Public - accessible to all site users
शेअर करा

छान दिसतेय ही पण. तुम्हा दोघांना झुकिनी कोरायला आवडते का? मला नेमका त्याचाच कंटाळा आहे Wink

Submitted by वेका on 1 September, 2015 - 11:18

तुला काय वाटतं आम्ही भोपळे कोरतो? मागच्या हॅलोविनला चिकटवायचे स्टिकर्स असतात ते डेकोरेशन केलं होतं.

अमेय, सॉरी फॉर अवांतर.

Submitted by वेका on 1 September, 2015 - 11:23

सिंडरेला,
टोमॅटोचा गर काढून टाकल्यामुळे इतकं पाणी नाही सुटत. कोरडं होईस्तोवर परतायचं.

सायो,
झुकिनी शिजते लवकर पण डायरेक्ट बेक करायला ठेवली तर पाणी सुटेल का पाहिले पाहिजे.
अर्धी शिजवून नीट पुसून मावेत ठेवली की मग अजिबात पाणी सुटत नाही.

Submitted by अमेय२८०८०७ on 1 September, 2015 - 12:31

अमेय,
मस्त रेसेपी. मी आक्खी झुकीनीच करते. तुकडे करत नाही आणि आधी शिजवूनही घेत नाही. तसंच स्टफिंगसाठी म्हणून इटालिअन किंवा प्लेन ब्रेड क्रम्स, बारीक चिरलेले मश्रूम्स, बारीक चिरलेला लसूण, मीठ मीरपूड, ताजी पार्सले, बेसिल, ऑलिव्ह ऑईल, आणि parmigiano reggiano चीज घेते. बेक झाली की वरून रीड्यूस्ड बाल्सामिक विनेगर ड्रीझल करायचं. बरोबर सॅलड, ब्रूशेटा असेल तर पूर्ण जेवण होते. पुन्हा केली की फोटो टाकेन.

Submitted by अंजली on 1 September, 2015 - 12:42

नाही सोन्याबापु, झिकिनी म्हणजे खीरा काकडी नाही. ही घोसाळी किंवा भोपळा वर्गीय भाजी आहे.

आमचा जुना भाजीवाला झुकिनीला हरा कद्दु म्हणायचा. हल्ली सगळे भाजीवाले झुकिनीच म्हणतात. इथे सगळ्या भाजीवाल्यांकडे झुकिनी सहज मिळते. आणि बाकीच्या भाज्यांच्याच किमतीत मिळते.
आम्ही कधीमधी आणतो त्यावेळा ग्रील किंवा स्टर फ्राय करतो. जरा हाताशी वेळ असेल त्यावेळी असे स्टफ करुन बेक करायचे लाड करून बघेन.

Submitted by अल्पना on 2 September, 2015 - 00:16

ओके ! आले लक्षात! गिलके किंवा घोसावळी म्हणतात त्या वर्गातली भाजी! मस्तच पाकृ आहे!! चीज़ वगैरे घालुन!

Submitted by सोन्याबापू on 2 September, 2015 - 00:20

कृती छान आहे. पण झुकीनी चवीला फार ब्लान्ड असते. त्यापेक्षा दोडकी जास्त छान लागतात. कोवळ्या दोडक्यांची विविध प्रकारे भाजी होते. तुरीची डाळ घालून, रस्सा भाजी, सुकी भाजी, पिठ पेरुन केलेली भाजी इत्यादी.

पिवळी झुकीनी सुद्धा मिळते. पुण्यात बावधनला मी दोन्ही रंगाच्या झुकीनी पाहिल्या आहेत.

Submitted by हर्ट on 2 September, 2015 - 00:44

सोन्याबापू, खिरे वेगळेच. खिरे जरा पांढुरके असतात बाहेरून आणि जाड साल असते. ती काकडीचीच एक जात आहे आणि नुसते चिरून तिखट-मीठ लावून मस्त लागतात.

झुकिनीला हरा कद्दु म्हणायचा >>> पहा, भाजीवाला हुशार आहे. झुकिनी स्क्वॅश कुळातलीच आहे.

Submitted by सिंडरेला on 2 September, 2015 - 09:15