संपूर्ण दिवस धावपळीत जातो, मग ट्रेनमधल्या गर्दीमुळे किंवा मोठ्ठ्या ट्राफिक जाममुळे उरला-सुरला संयमसुद्धा कापरासारखा उडून जातो. पोटात कावळे कोकलत आणि डोक्यात रातकिडे किरकिरत असताना घरी आल्यावर गरमागरम वरणभात समोर यावा आणि टीव्ही किंवा रेडीओवर आपल्या अत्यंत आवडत्या गायक/गायिकेचं आवडतं जुनं गाणं लागावं की कसं वाटतं ? रणरणत्या उन्हात अचानक एखादी थंड हवेची झुळूक आल्यासारखं वाटतं. त्या थोड्याश्याच वेळात आपण अजून एक दिवस लढवायची हिंमत गोळा करतो आणि शांतपणे निजतो.
तसंच काहीसं, एकामागोमाग एक रद्दड चित्रपट डोक्यावर आदळत असताना, त्याच त्या बातम्या आणि त्याच त्या सिरियल्स उरल्या-सुरल्या संयमाचाही कापूर करत असताना, एखादा असा चित्रपट - जो थोड्या गुदगुल्या करतो, थोडं हळवं करतो आणि बराचसा आपलाच वाटतो - आल्यावर वाटतं. त्या दोन-अडीच तासांत आपण (म्हणजे, मी तरी) अजून काही रोहित शेट्टी, प्रभुदेवा वगैरे सहन करू शकण्याची हिंमत गोळा करतो आणि शांतपणे चित्रपटगृहातून बाहेर पडतो.
'पिकू' हे नाव जितकं छोटंसं आहे, तितकीच चित्रपटाची कहाणीसुद्धा. ही कहाणी आहे एक बाप आणि एका मुलीची आणि ह्या दोघांची कहाणी बदलणाऱ्या एका तिऱ्हाईताची.
'पिकू' (दीपिका पदुकोण) एक स्वतंत्र विचारांची तरुण व्यावसायिक. बोलण्यात इतकी फटकळ की तिला कस्टमर्ससमोर नेताना तिच्या पार्टनरला भीती वाटते की ही कुणाला काय सुनावेल ! आणि वागण्यात इतकी खडूस की टॅक्सी ड्रायव्हर तिचं भाडं आल्यावर टाळाटाळ करतात. भास्कर बॅनर्जी (अमिताभ बच्चन), तिचे वडील म्हणजे तिचा हर तऱ्हेने 'बाप'. स्वत:शी सोडून इतर कुणाशीही सरळ न बोलणारा आणि आजारी पडण्याची प्रचंड इच्छा असणारा. असे हे एकापेक्षा एक विक्षिप्त बाप-लेक दिल्लीत एकमेकांवर व कक्षेत येणाऱ्या प्रत्येक व्यक्तीवर डाफरत एक आयुष्य जगत आहेत.
आणि दुसरीकडे राणा चौधरी (इरफान खान) हा एक टॅक्सी एजन्सीचा मालक, व्यावसायिक अपयशाशी झुंजत आणि विक्षिप्त आई व बहिणीमुळे वैतागलेला, स्वत:चं एक आयुष्य जगत आहे.
हे तिघे वैतागलेले एकत्र येतात, जेव्हा भास्कर बॅनर्जी आपल्या माथेफिरू स्वभावानुरूप दिल्लीहून कोलकात्याला टॅक्सीने जायचं ठरवतो. हा तीस-चाळीस तासांचा प्रवास तिघांसाठी गेल्या तीसेक वर्षांचे संस्कार बदलणारा ठरतो. चित्रपटाचा शेवट अनेक उत्तरं, प्रश्न न विचारता देतो.
एक रोड ट्रीप 'जिंदगी ना मिलेगी दोबारा' मध्ये होती, जी तीन मित्रांचा आयुष्याकडे पाहण्याचा दृष्टीकोन बदलते.
एक रोड ट्रीप 'फाईण्डिंग फॅनी' मध्ये होती, जी कुणाला कुणापर्यंत घेऊन गेली नाही, पण तरी खूप काही दाखवणारी होती.
आणि एक रोड ट्रीप 'पिकू' ची आहे, जी फक्त दिल्ली ते कोलकाता जात नाही, तर 'पिकू'पासून 'पिकू'पर्यंत 'भास्कर'पासून 'भास्कर'पर्यंत आणि 'राणा'पासून 'राणा'पर्यंत जाते.
'जिंनामिदो' आणि 'फाफॅ' काहींना खूप आवडले होते, तर काहींना ते सपशेल कंटाळवाणेही वाटले होते. 'पिकू'चं नक्कीच तसं नाही आहे कारण इथली 'रोड ट्रीप' हा सगळ्यात महत्वाचा भाग असला तरी त्याला खूप जास्त वेळ दिलेला नाही आणि दीपिका-अमिताभमधली धुसफूस आपण रोज पाहत, अनुभवत असतो, त्यामुळे एक तार जुळतेच.
'पिकू' असं नाव का आहे, मूळ नाव नक्कीच वेगळं असणार, पण ते सांगणं किंवा ह्या विक्षिप्तांच्या विक्षिप्तपणाची कुठलीही स्पष्ट कारणमीमांसा देत बसणं आणि अश्याच काही कमी किंवा बिन महत्वाच्या गोष्टी पूर्णपणे टाळून, त्यांना समजून घेता येईल इतपत पार्श्वभूमी, तीही ओघातच, मांडणं दिग्दर्शक शूजीत सरकारांनी खुबीने केलं आहे. भास्कर बॅनर्जीचं अपचन व बद्धकोष्ठाने त्रस्त असणं आणि सतत त्याचाच विचार करत राहणं, हा त्याच्या व्यक्तित्वाचा पैलू एकंदर मांडणीला थिल्लर किंवा चावट बनवण्याकडे नेऊ शकला असता. मात्र, ते होण्या न होण्यामधली छोटीशी सीमारेषाही सरकारांनी अचूक हेरली आणि पाळली आहे, हे विशेष. हा चित्रपट कुठल्याही व्यक्तिरेखेचं उदात्तीकरण किंवा खच्चीकरणही करण्याच्या फंदात पडत नाही. खरं तर अशी पात्रं इथे आहेत. जसं की बॅनर्जीचा डॉक्टर मित्र श्रीवास्तव (रघुवीर यादव), जो त्याला त्याच्या अवास्तव आजाराग्रहाबद्दल कधी बोलत नाही आणि ३-४ लग्नं करणारी पिकूची बिनधास्त मावशी (मौशुमी चटर्जी).
दीपिका आणि 'पिकू' इतक्या एकरूप झाल्या आहेत की कुठेही पुसटसासुद्धा उल्लेख न येताही 'पिकू' हा 'दीपिका'चाच शॉर्ट फॉर्म असणार हे आपण नकळतच ठरवून टाकतो. वडिलांच्या विचित्र वागण्याला अतिशय कंटाळलेली, त्यांच्याशी भांडणारी आणि तरीही कुठल्याही मुलीसारखीच आपल्या बापासाठी प्रचंड हळवीही असणारी, 'माझ्याशी लग्न करणाऱ्याला माझ्या ह्या सत्तर वर्षाच्या बाळाचीही जबाबदारी घ्यावी लागेल' असं म्हणणारी 'पिकू' तिने सुंदर साकारली आहे. बिना मेकअपची दीपिकाचं 'गर्ल नेक्स्ट डोअर' दिसणं, हे वेगळंच !
अमिताभने आयुष्यात दुसऱ्यांदा 'भास्कर बॅनर्जी' नावाचं पात्र साकारलं आहे. १९७१ साली आलेल्या, भारतीय चित्रपटसृष्टीतील सर्वोत्कृष्ट चित्रपटांपैकी एक 'आनंद' मधला त्याचा भास्कर बॅनर्जी, एक बुजरा, थोडासा निराश डॉक्टर त्याने ज्या सहजतेने उभा केला होता, त्याच सहजतेने ४४ वर्षानंतर हा दुसरा विक्षिप्त भास्कर बॅनर्जी त्याने उभा केला आहे. बोलण्यातली बंगाली ढब त्याने अशी काही राखली आहे की एखादा अस्सल 'बाबू मोशाय'च वाटावा. अमिताभ आता एक चालतं-फिरतं अभिनयाचं गुरुकुल झाला आहे, ह्याबद्दल वादच नाही. त्याच्या सहजतेने बॅनर्जीच्या अत्यंत त्रासदायक विक्षिप्तपणावरही माया करावीशी वाटते.
ही कहाणी, हा चित्रपट पिकू आणि बॅनर्जीचा असला तरी जिथे जिथे इरफान खान पडद्यावर येतो, तिथे तिथे पडदा त्याच्यासाठीच आहे, असं वाटतं. केवळ आपल्या अभिनयाच्या जोरावर चांगले दिसणारे मोजके अभिनेते आहेत, त्यांत इरफान खान नक्कीच येतो. एरव्ही हे बटबटीत डोळे व ओबडधोबड सुजलेला चेहरा आपण कधीच पाहणार नाही. पण ह्या चेहऱ्यामागे दडलेला एक कलंदर अभिनेता जेव्हा समोर येतो, तेव्हा हाच चेहरा जगातला सगळ्यात सुंदर चेहरा बनत असावा. हे मी अगदी विचारपूर्वक सांगतो की अमिताभसमोरही इरफान आपलं नाणं खणखणीत वाजवतो.
ह्या चित्रपटाला नितांत आवश्यकता होती आणि तशी संधीही होती, श्रवणीय, गोड चालीच्या संगीताची. ती काही म्हणावी तशी पूर्ण झाली नाही. एक तर असलेली गाणी तुकड्या-तुकड्यांत आहेत आणि ती विशेष लक्षातही राहत नाही. 'पिकू'ला २-३ 'सवार लूँ'ची जोड मिळाली असती, तर गालबोट लावायलाही जागा उरली नसती. तरी, माझ्यातल्या चित्रपटत्रस्तासाठी एक अत्यावश्यक 'पिकूटॉनिक' मला नक्कीच मिळालं आहे.
रेटिंग - * * * १/२
http://www.ranjeetparadkar.com/2015/05/movie-review-piku.html
हे परीक्षण मराठी दैनिक 'मी मराठी लाईव्ह' मध्ये आज (०३ मे २०१५ रोजी) प्रकाशित झाले आहे :-
रसप, परिक्षण प्रकाशनाबद्दल
रसप,
परिक्षण प्रकाशनाबद्दल मनःपूर्वक अभिनंदन!
पण मी असे ऐकले की हा चित्रपट कमालीचा कंटाळवाणा आहे.
छान लिहिलंय. नक्की पाहणार.
छान लिहिलंय. नक्की पाहणार.
छान लिहीलेय, नक्की बघेन
छान लिहीलेय, नक्की बघेन
दिपीका प्रत्यक्षात कशी का
दिपीका प्रत्यक्षात कशी का असेना, मला ती तुफान आवडते. अमिताभ बद्दल क्या कहने. आणी इरफान पण यात म्हणजे दूधात केशर-जायफळ-वेलची आणी भरपुर्र ड्रायफ्रुट्स आहेत की. पहावा लागेल.
रसप छान आहे परीक्षण.:स्मित:
छान लिहिलंय. इतरत्रही
छान लिहिलंय. इतरत्रही रीव्यूज् चांगले आहेत. चार तारे वगैरे.
मंगळवारी पाहाणार आहे. (आधीची हवी ती तिकिटं मिळाली नाहीत.)
मागे फाईंडीग फेनी की काहीसा
मागे फाईंडीग फेनी की काहीसा चित्रपट पाहिला होता.. आणि बरेच दिवस कोणालातरी बदडून काढावे असे वाटत होते..
या चित्रपटाचा पोस्टर पहिल्यांदा पाहिला तेव्हा मला त्या चित्रपटाचीच आठवण आली कारण अश्याच काहीश्या विचित्र विक्षिप्त व्यक्तीरेखा..
बस्स आणखी काही बोलायचे नाही.. हे परीक्षण वाचायचे धैर्य दाखवले हीच आजची अचिव्हमेंट .. तरीही चित्रपट बघायचा जुगार खेळायची हिंमत माझ्यात नाही.. या लेखातही फाइन्डीग फन्नीचा उल्लेख झाल्यावर तर नाहीच नाही..
आयुष्य खुप छोटे आहे आणि त्यातील अडीजतीन तास मी पुन्हा पुन्हा वाया नाही घालवू शकत..
'पुन्हा' म्हणजे?
'पुन्हा' म्हणजे?
(No subject)
तू लिहिलेले आणि मी वाचलेले
तू लिहिलेले आणि मी वाचलेले असे हे पहिलेच परिक्षण. छान उतरले आहे. वाचून बघावासा वाटत आहे.
पण तू दिलेले रेटिग्स कळले नाही?
रेटिंग - * * * १/२>>>
तीन तारे, की एक गुण की २ गुण की फक्त अर्धाच गुण?????
बी, दिड गुण आहे तो
बी,
दिड गुण आहे तो
आणि किती पैकी? त्या रेंटीग ला
आणि किती पैकी?
त्या रेंटीग ला इतके किचकट का लिहिले कळले नाही.
'पुन्हा' म्हणजे? >>> म्हणजे
'पुन्हा' म्हणजे?
>>>
म्हणजे आधी तो फाईन्डींग फन्नी
* * * १/२ >>> म्हण्जे साडेतीन
* * * १/२
>>>
म्हण्जे साडेतीन तारे पाच पैकी .. ७० टक्के .. फर्स्टक्लास !
ओके धन्यवाद आमच्यावेळी तारे
ओके धन्यवाद आमच्यावेळी तारे हे प्रकरण नव्हतचं म्हणून संभ्रमात पडलो
खूप सुंदर चित्रपट आहे.
खूप सुंदर चित्रपट आहे. दीपीका, अमिताभ, इरफान आणि सिनेम्यातल्या प्रत्येकाने अतिशय उत्कृष्ट अभिनय केलेला आहे. अगदी बॅनर्जींचा नोकर बोधनपासून दीपीकाचे काका काकू, दीपीकाचा बिझनेस पार्टनर इत्यादी सर्वच व्यक्तीरेखा ठळकपणे लक्षात राहतात.
सिनेमाची कथा साधी सरळ सोपी आहे. अमिताभच्या तोंडचं शेवटचं एक वाक्य सिनेमाचा हायलाईट ठरावा.
दीपीकाचा वॉर्डरोब मस्त फ्रेश आहे. विनामेकपची दीपीका फार गोड दिसते.
बेफिजी, माझी मी मतं मांडत
बेफिजी,
माझी मी मतं मांडत असतो. माझ्या मते एक प्रयोग म्हणून 'कोर्ट' हा अतिटुकार चित्रपट होता आणि एक वेगळी वाट म्हणून 'पिकू' अत्युत्तम. दोन्हीची तुलना ह्यासाठीच की, दोन्हींनाही फार विशेष असं कथानक नाही आणि दोन्ही चित्रपट संथ आहेत.
बाकीच्यांना त्यांची उत्तरं मिळाली आहेत, ह्याचा आनंद आहे कारण मी नसती दिली!
मस्त लिहिलंय परिक्षण. बघायलाच
मस्त लिहिलंय परिक्षण. बघायलाच हवा.
Must watch category तला
Must watch category तला सिनेमा आहे! माझ्याकडून ५ स्टार्स! ह्यात एकही गाणं नसलं असतं तरी काही फरक पडला नसता. त्यामुळे आहेत ती background ला वाजण्यापुरती गाणी पुरेशी आहेत. This is the movie of the year so far. Go go go watch Piku! Hats off to Shoojit Sircar. for me today is one of those days when I feel proud of Bollywood movies!
छान परिक्षण. बघायलाच हवा असं
छान परिक्षण. बघायलाच हवा असं वाटतय..
मागे फाईंडीग फेनी की काहीसा
मागे फाईंडीग फेनी की काहीसा चित्रपट पाहिला होता.. आणि बरेच दिवस कोणालातरी बदडून काढावे असे वाटत होते.. >>>
मस्त परिक्षण. बघायला हवा.
मस्त परिक्षण. बघायला हवा.
छान लिहीलय. नक्की बघणार.
छान लिहीलय. नक्की बघणार.
आयुष्य खुप छोटे आहे आणि
आयुष्य खुप छोटे आहे आणि त्यातील अडीजतीन तास मी पुन्हा पुन्हा वाया नाही घालवू शकत.. >>
जाउ दे रे रुमन्या तु आपले दुनियादारी आणि शाखाच बघ..
ऋन्मेऽऽष, तु राहू देत,
ऋन्मेऽऽष, तु राहू देत, तुझ्याच्याने नाही होणार...
फार मस्त सिनेमा! सगळ्यांची
फार मस्त सिनेमा! सगळ्यांची कामे झकास. काही काही फ्रेम्स फार देखण्या झाल्यात .
दिपिका आवडायला लागली
रसप , गाण्यांच्या बाबतीत इथे वाचल्यावर जाणवल.
रसप, मला हे परिक्षण आवडलय...
रसप, मला हे परिक्षण आवडलय... भारी. हल्ली इथे (सिडनी नगरी) काही हिंदी चित्रपट, चित्रपटगृहात लागू लागले आहेत. तेव्हा लक्षं ठेवून नक्की बघेन.
नाहीतर आहेच डीव्हीडी घेऊन बघणे.
पुन्हा एकदा - सुंदर शब्दांत परिक्षण...
मस्त परीक्षण. चित्रपट आवडेल
मस्त परीक्षण. चित्रपट आवडेल की नाही हे तो बघितल्यावरच सांगता येईल. पण हे परीक्षण मात्र खूप आवडले.
परीक्षण आवडलं आणि पिकु तर
परीक्षण आवडलं आणि पिकु तर फारच आवडला ..
खरंच मस्ट वॉच!
याची जाहिरात टीव्हीवर केलीच
याची जाहिरात टीव्हीवर केलीच नव्हती त्यामुळे कळले नसते. रसप, खुप आभार. नंतर टीव्हीवर आला तर बरं होईल, पहायला तरी मिळेल. चित्रपट चालला का? नको ते चालतात.
तीन दिवसांत २५ कोटी जमवले.
तीन दिवसांत २५ कोटी जमवले. माउथ पब्लिसिटीने अजून चालेल चांगला!
Pages