पुण्याचे (गायब असलेले ) सायकल ट्रॅक -

उत्तम पोस्ट...एकूण एक मुद्द्याशी सहमत....
मी ते पेव्हड ब्लॉक बघूनच तिथे सायकल चालवण्याचा विचार सोडून दिला. पण माझ्या भावाने प्रयत्न केला आणि पहिल्याच प्रयत्नात सपाटून आपटला आणि ढोपरं फोडून घेतली.

ज्याने कुणी हे ब्लॉक लावायची आयडीया केली असेल त्याला आणि त्याला अनुमोदन देणाऱ्याला शिक्षा म्हणून त्याच ट्रॅकवरून किमान आठवडाभर सायकल चालवायला लावली पाहिजे. मुर्ख लेकाचे....

पादचाऱ्यांचा मुद्दाही तसाच. एकदा ट्रॅफिक जॅम झाल्यामुळे नाईलाजास्तव मी सायकल ट्रॅकवर सायकल नेली तर तिथे एक काकू निवांत फिरत फिरत चालल्या होत्या. मी त्यांना बाजूला व्हा म्हणले तर इतक्या जळजळीत नजरेने त्यांनी निषेध व्यक्त केला. आता काय अंगावर घालतो का सायकल. आम्ही काय चालायचे पण नाही का, या प्रश्नावर अहो काकू हा सायकलचा रस्ता आहे असा माझा दुबळा बचाव इतका तोकडा पडला की बास.

पण त्याची दुसरी बाजू अशी आहे की पुण्यासारख्या शहरात जिथे तुम्हाला मुळातच रस्ते कमी पडतात तिथे सायकल ट्रॅकची चैन न परवडण्यासारखी आहे. आपल्याकडे गाड्यांना, लोकांना चालायला रस्ते नाहीत. सिंहगड रोडवर रात्री आठच्या सुमारास जो काही राडा होतो तो पाहता तिथे चारपदरी रस्ताही कमी पडेल असे वाटते. तिथे मोजक्या सायकलस्वारांसाठी वेगळा रस्ता करणे प्रॅक्टिकली शक्य नाही.

त्यामुळे हे सगळे सायकल ट्रॅक आता पादचारी मार्ग म्हणून घोषीत करावेत आणि त्यावर कुठल्याही परिस्थितीत गाड्या जाणार नाहीत एवढे पहावे तरी भरपूर आहे.

सिंहगड रोडवर रात्री आठच्या सुमारास जो काही राडा होतो तो पाहता तिथे चारपदरी रस्ताही कमी पडेल असे वाटते. तिथे मोजक्या सायकलस्वारांसाठी वेगळा रस्ता करणे प्रॅक्टिकली शक्य नाही.

त्यामुळे हे सगळे सायकल ट्रॅक आता पादचारी मार्ग म्हणून घोषीत करावेत आणि त्यावर कुठल्याही परिस्थितीत गाड्या जाणार नाहीत एवढे पहावे तरी भरपूर आहे. >>> +१११

यात अजून एक भर - रस्त्यावरचे पार्कींग बंद करणे.

रस्त्यावरचे पार्किंग बंद केले तर लोक गल्लीबोळात लावतील त्याने अजून वैताग होईल.

पुण्यातच काय किंवा अजून कुठल्या शहरात काय, लोकांना पार्किंग सोयस्कर ठिकाणी हवे असते. ते केलेत तर बाकी कुठलेही निर्णय मान्य केले जातात. लक्ष्मी रोड, जंगली महाराज रोड किंवा फर्गसनवरचे पार्किंग तसेच ठेऊन ते एकेरी केलेत. तिथले पार्किंग बंद करून ते रस्ते पुर्वीसारखे दुहेरी केले तर बघा किती दंगा होईल ते. मैलभर अंतरावर गाडी लाऊन चालत जाणे अजूनही लोकांच्या मानसिकतेमध्ये बसत नाही. आणि मग त्यातले लूपहोल्स शोधले जातात.

ते पण खरे आहे. पण पार्किंग करताना तरी जरा सेन्स वापरावा न, ते पण होत नाही.
सायकल ट्रकवरून गाडी नेणार्‍या माणसाचा धक्का लागल्यामुळे माझा एक मोबाईल हरवला आहे. जाउदे, अजून लिहीत बसले तर सिंहगड रोडचा ट्रफीक प्रोब्लेमवर बाफ वळेल, त्यामुळे ईथेच बास करते.

नाही काही तर पुण्यात घालवलेली पाच वर्षे आठवली!!

ईंटरेस्टींग .. सायकल ट्रॅक.. नशीबवान आहात लेकांनो.. नाहीतर आमची मुंबई

व्यायाम म्हणून असेल तर रात्री एक ते चार साइकल चालवा.बाकी कामाकरता आता इतिहासजमा.

ते ठिक आहे. पण झोपण्याचे काय मग ?

पण झोपण्याचे काय मग ? >> दुपारी एक ते चार

रात्री एक ते चार----प्रिssssये पाहा राsssत्रीचा समय सरुनीsssहे गाणे पहाटे दुधाच्या (चितळे दुध )गाड्या दिसू लागल्यावर गावे,आणि साइकल घेऊन आपापल्या घरी परतावे.दुपारी ऊन फार असते.मला साइकल चालवण्याची आवड (उत्साह)सहावीपर्यंतच होती नंतर सुटली.मोठेपणी बागेसाठी गावाबाहेरून माती आणण्यासाठी भाड्याने तासावर घेउ लागलो(ओटोपेक्षा स्वस्त !!) मातीच्या पिशव्या लावल्या की जड व्हायचे म्हणून ढकलत आणायचो ,जाताना चालवत. परंतू माझ्या चेहय्राकडे पाहून तीस फुटांवरचे लोक अगोदरच रस्त्याच्या बाजूला व्हायचे म्हणून जातानाही ढकलत नेऊ लागलो.थोडक्यात सांगायचे तर हा पुण्याचा साइकल-ट्रॅक माझ्या कामाचा आहे.साइकल-चालवणाय्रांना माझ्याकडून शुभेच्छा,जर्मनीसारखा ट्रॅक होवो.

छान माहिती.

बी आर टी चे घोडे नाचविल्यामुळेही वाहतूक खोळंबा झाला. उपलब्ध पैसे वापरुन बस दुरुस्ती, बसच्या संख्येत वाढ असे उपक्रम फार कमी आणि महागडे बसस्टॉप उभारण्याचे काम मोठ्या प्रमाणात झाले. एकूणच पुण्याचे प्रशासकीय अधिकारी आणि लोकप्रतिनिधी निव्वळ बोलघेवडे आहेत याचा प्रत्यय आला.

मूळातच सायकल ट्रॅक ही संकप्लना अत्यंत चूकीच्या पध्दतीने राबविली गेली. किकुने मांडलेल्या सर्वच मुद्यांशी सहमत आहे. सायकल ट्रॅक हा प्रयोग सरसकट सर्व रस्त्यावर राबविण्याऐवजी कमी गर्दीच्या व प्रशस्त रस्त्यावर रावबिला असता तर त्याला चांगला प्रतिसाद मिळाला असता. उदा. पुणे विद्यापीठ ते औंध ब्रेमेन चौक किंवा पाषाण वावधन रस्ता असे रस्ते आहेत जिथे दोन्ही बाजूस दुकाने किंवा व्यावसायिक नाहीत सहाजिकच अतिक्रमणाचा प्रश्न येत नाही. विद्यापीठ रोडच्या सायकल ट्रॅकचा वापर मी केला आहे, तो डांबरी आहे. बाकी इतर ठिकाणी म्हणाल तर अरुंद रस्ते आणि वाहतुकीच्या खोळंब्याने सायकल ट्रॅक हा दुचाकीसाठी पर्यायी मार्ग ठरतो,

>>>> पुणे शहरातील मुख्य रस्ते म्हणजे कर्वे रस्ता,पौड रस्ता,सिंहगड रस्ता, कात्रज हडपसर रस्ता, नगर रस्ता, विद्यापीठ, बाणेर रस्ता या रस्त्याचे कॉक्रीटीकरण करताना रस्त्याच्या दोन्ही बाजूस साधारण २ ते २.५० मी रुंदीचा फूटपाथ व तेवढाच सायकल ट्रॅक करण्याचे काम करण्यात आले <<<<

काय थापा मारताय राव! अफवा पसरवू नका.... नैतर तुम्हाला कॉन्ग्रेसद्वेष्टे ठरविले जाईल!

>>> व्यायाम म्हणून असेल तर रात्री एक ते चार साइकल चालवा.बाकी कामाकरता आता इतिहासजमा. <<<<
रात्री? तेव्हा त्या भटक्या कुत्र्यांच्या टोळीच्या हल्ल्यापासून कसे वाचायचे?

काय थापा मारताय राव! अफवा पसरवू नका.... नैतर तुम्हाला कॉन्ग्रेसद्वेष्टे ठरविले जाईल!

ही माहिती मला माहिती अधिकाराखाली मिळालेली आहे, त्यात तथ्य आहे पण वर मांडलेल्या मुद्यामध्ये एवढी रुंदी सलग नसते, अतिक्रमण वगैरे आहेच.... तुम्हाला पाहिजे असेल तर हवे त्या रस्त्यावर किती लांबीचा सायकल ट्रॅक आहे याबाबत सविस्तर माहिती पुरविण्यात येईल. कालच्या सकाळमध्ये याबाबत एक लेख आलेला आहे ही लिंक घ्या .

http://epaper.esakal.com/Sakal/19Apr2015/Enlarge/PuneCity/Pune1Today/pag...

यानुसार पुण्यात १३२ किमीचे सायकल ट्रॅक आहेत .. आहात कुठे भाऊ .. ते ठिक नाहीत ही गोष्ट वेगळी.

६) चायनिज गाड्या, टप-या , पथारीवाले, वॉशिंग सेंटर यांच्यासाठी सायकल ट्रॅक म्हणजे महानगरपालिकेने आपल्या व्यवसाय वाढण्यासाठी पुरविलेली अतिरिक्त जागा आहे असा भ्रम करुम घेतला आहे , सध्याकाळ झाली कि आपापले फोल्डींग टेबल मांडून सर्रास सायकल ट्रॅक अडविला जातो, अशी अतिक्रमणे काढण्यासाठी महानगरपालिका कारवाई करते खरी पण ती फारच अर्धवट, तातुरती असते.>>> एक लाख अनुमोदने.

सिंहगड रोडवर रात्री आठच्या सुमारास जो काही राडा होतो तो पाहता तिथे चारपदरी रस्ताही कमी पडेल असे वाटते. तिथे मोजक्या सायकलस्वारांसाठी वेगळा रस्ता करणे प्रॅक्टिकली शक्य नाही.>>
राजाराम पुल सोडला की जी भाजीवाळी मंडळी बसतात ती थेट संतोष हॉलच्याच्या पुढे पर्यंत आहेत. गंमत अशी की रोज हप्ता दिल्यामुळे भाजीवाली माजात असतात व ती भाजी घ्यायला आलेल्या ग्राह़कांच्या गाड्या नो पार्कींग म्हणुन उचलल्या जातात. या लोकांना विस्थापीत करण्यासाठी दोन-तिन ठिकाणी मंडईची इमारत उभी आहे तिथे मात्र अजुन उद्घाटनच झालेले नाही. जुगार दारु पिण्याकरता मात्र सोय झाली आहे. फनटाईमच्या अलीकडे वाईनशॉपखालीच रस्त्यावर लोक दारु पित असतात.

पुण्यात सायकल चालवणे, यामुळे टळणारे प्रदुषण व वहानांच्या कोंडींच्या समस्या यावर उपाय असे विचार करुन जे कोणी सायकल स्वारासाठीचे रस्ते बनवले असतील असे वाटत नाही.

पुणेकर कधी काळी सायकलस्वारांचे होते, मग ते मोटरसायकल स्वारांचे झाले आता ते चौचाकी स्वारांचे हळु हळु होत आहे.

जसे पुरुषांनी घोतर घालणे किंवा स्त्रीयांनी नऊवारी , नथ असा पहेराव करणे जसे अशक्य आहे तसेच कधी काळी पुणेकर सायकलचे युग पुन्हा आणतील ही अपेक्षा व्यर्थ आहे.

वेगळा रस्ता म्हणजे सिमेंट ओतुन भ्रष्टाचार आणि त्या रस्त्याचा गैरवापर दोन्ही आलेच. या पेक्षा आहे तो रस्ता कोणालाही राखीव न ठेवता मोठा करुन त्यावरुन सर्रास सायकल, दुचाकी आणि सर्वच वहानांची वहातुक करणे पुण्याचा राजकीय इतिहास, नोकरशहांचा निद्रिस्तपणा, आणि नागरिकांचा आरंभशुरपणा पहाता योग्य ठरेल.

आधीच त्या बी आर टी ने खेळ झालाय त्यात नव्याने याची भर नको.

दुचाकीवर आपण सगळी रिस्क घेऊन चालवतोच ना ? तीच रिस्क सायकल स्वारांना आहे असे मला वाटते. कधी काळी २ सायकली जाणार म्हणुन रस्त्याचा एक भाग राखीव ठेवणे माझ्या मते चुकीचे आहे.

>>> कधी काळी २ सायकली जाणार म्हणुन रस्त्याचा एक भाग राखीव ठेवणे माझ्या मते चुकीचे आहे. <<<<
या मताशी असहमत.
याच विचारसरणीतून, गेली असंख्य वर्षे, कधी काळी दोनचार स्त्रीया जाणार, तर त्यांना स्वच्छतागृह राखीव ठेवणे चूकीचे वाटल्याने , आजवर व आजही, सार्वजनिक स्थळी स्त्रीयांकरता नैसर्गिकविधीकरताही सुरक्षित/राखिव/स्वच्छ सोय नसते हे वास्तव.
या निलाजर्‍या वास्तवापुढे त्या तुलनेत "सायकलस्वारांकरता" वगैरे जागा करुन देणे म्हणजे दिवसाढवळ्या शेखचिल्लीची स्वप्ने बघण्यासारखे आहे.

कधीकाळी २ सायकली जाण्याची काळजी वाटते का? तर काही नाही, पेट्रोल १००/१२५ रुपये लिटर करा, चट्टदिशी निम्मे बाईकवाले सायकलवर येतील.
मी ८० रुपये लिटरलाच सायकलीवर आलो. (मी अनुभूति व अनुभव याशिवाय एक अक्षरही खरडत/बोलत नाही हे परत परत सांगायला नकोच! )

लिंबुजी,

आपला प्रतिसाद मिळाला. धन्यवाद ! आपल्याला आलेल्या अनुभुती आणि अनुभवाशी मी सहमत नाही.

सायकल रस्ता आणि स्त्रीयांसाठीची स्वच्छतागृहे यात काहीच साम्य नाही. हे दोन स्वतंत्र विषय आहेत असे मला वाटते.

कारणे

१) स्वच्छतागृहे अनिवार्य आहेत त्याला पर्याय नाही.
२) स्वच्छतागृहे अगदी १ किलोमीटरला एक असले तरी रस्त्याच्या बाजुला असेल आणि रहदारीला अडथळा निर्माण करणार नाही.

३) सायकल रस्ता ही माझ्यामते चैनीची बाब आहे. मी फार पर्यावरण वादी आहे असा आव आणणारे ( फार थोडे जे चर्चा करत नाहीत ) सोडता प्रत्यक्षात त्याचा वापर होत नाही. उदा. कात्रज ते स्वारगेट या भागात जो सायकल रस्ता होता तो आजही पहा. तासाला एक सुध्दा सायकल जात नाही.

४) सायकल रस्ता आणि बी आर टी मुळे कोंडी होत आहे.

सायकल चालवु नये अश्या मताचा मी नाही. मुद्दा राखीव रस्ते कसे अनावश्यक आहेत असा आहे.

मुळात नविन रस्ते करा हा मुद्दा नसुन आहेत ते\केलेले सायकल ट्रॅक हे जर सायकल चालवण्याकता उपयोगी नसतील तर काय करायचे हा आहे. तेच सायकलस्वार रस्त्यावरुन आल्याने कोंडेमधे आणखी भर पडते. स्वयंचलीत सायकल नसल्याने मुख्य रस्त्यापेक्षा वेगळा ट्रॅक असेल तर वाहतुक समस्या थोडी १% व प्रदुषण समस्त्या १-२% जरी कमी झाली तरी उपयोग होईल. त्या निमित्ताने अनधिकृत टपर्‍या पथारीचेही निर्मुलन होईल.

मला वाटतं BRT चा रस्ता तसाही सध्या वापरात येत नाही. तर त्याचे रस्ता BRT ऐवजी MRT म्हणजे मोटार सायकल रॅपीड ट्रान्सिट म्हणून घोषीत करावा. त्यामुळे मुख्य रस्त्यावर त्यांचा त्रास जाणवणार नाही. हे मोटार सायकलस्वार महा भयानक असतात. त्यांचा त्रास कारवाले ते पायी चालणारे ह्या सर्वांना होतो.

ज्याने कुणी ब्लॉक रस्ता सायकलचा केला आहे, त्याला बहुदा पुण्यातून सायकल हद्दपार करायची आहे. ३० वगैरे सोडा १५ चाही स्पीड त्या रस्त्यावर डेंजरस ठरू शकतो.

पुण्यात कधी सायकलचे टार रोड होतील ही अपेक्षा अजिबातच राहीली नाही. भारतात सायकलला कार्बनचे दिवस कधी येवोत ते देवच जाणे.

सायकल घेऊन सायकल ट्रॅकने जाण्याचा मुर्खपणा एकदा केला होता. ढोपरे नाही फुटली, पण कळून चुकले की पुण्यातील सायकल ट्रॅक हे सायकलस्वारांसाठी नाहीत.

सायकल रस्ता ही माझ्यामते चैनीची बाब आहे. असहमत
अजूनही कामासाठी आणि शाळा कॉलेजात जाण्यासाठी सायकल वापरणारे खूप आहेत. सायकल ट्रॅक असावा कि नसावा याबाबत मतभेद असू शकतील पण सध्या जे ट्रॅक बनवून ठेवलेत त्याचे काय, एकतर ते व्यवस्थित आणि सुरक्षित असणे , तसेच त्याचा वापर होण्यासाठी पावले उचलणे गरजेचे आहे.